Akoma e hapur mundësia për të aplikuar për Çmimin e Vitit në vlerë 130 mijë denarë

Banka Popullore e Maqedonisë së Veriut deri më 1 shkurt të vitit 2025 do të pranojë aplikime në Konkursin për Çmimin e Vitit 2024 që i jepet qytetarëve deri në moshën 35 vjeçare, transmeton Portalb.mk.

“Konkurs për Çmimin e Vitit për Hulumtues të Rinj për punimin më të mirë nga fusha e makroekonomisë dhe bankat për vitin 2025. Çmimi ndahet për nxitjen e zhvillimit të opinionit shkencor dhe hartimin e punimeve nga fusha e makroekonomisë dhe bankave dhe sistemeve bankare, si dhe afirmimin e kuadrove të reja dhe profesionale”, sqaroi Banka Popullore.

Në këtë konkurs nuk do të mund të marrin pjesë punonjësit e Bankës Popullore dhe anëtarët e Këshillit të Bankës. Punimet duhet të dorëzohen në gjuhën maqedonase, shqipe ose angleze.

“Shpërblimi është në formë monetare, e cila për punimin e çmimit të parë është 130.000 denarë, ndërsa për çmimin e dytë është 65.000 denarë”, raportoi Banka.

Punimet mund të dorëzohen në Bankën Popullore ose në adresën elektronike [email protected].