Apeli ia vërteton dënimin prej 11 vjetësh burgim gruas që vrau kunatën

Gjykata e Apelit ia ka vërtetuar dënimin prej 11 vjetësh burgim Nazire Abdylit, e cila akuzohet se më 23 dhjetor 2022 në fshatin Kuk të Dragashit, e ka vrarë kunatën e saj Saime Domazetin.

Kjo u konfirmua për Klankosova.tv nga Besim Morina, avokati i të akuzuarës.

“Po, Apeli ia ka vërtetuar dënimin”, tha ai shkurtimisht për Klankosova.tv

Më 17 maj, Abdyli ishte dënuar nga Themelorja me 11 vjet burgim.

Në seancën fillestare të mbajtur më 15 shtator 2023, e akuzuara e kishte pranuar se e kishte goditur tani të ndjerën, kunatën e saj.

Por, e kishte mohuar vrasjen.

Më 13 korrik 2023, Prokuroria Themelore në Prizren, Departamenti i Krimeve të Rënda ka ngritur aktakuzë ndaj Nazire Abdylit, se më 23 dhjetor 2022, me dashje ka privuar nga jeta anëtaren e familjes, motrën e bashkëshortit (kunatën), me të cilën ka jetuar në ekonomi të përbashkët familjare, e mllefosur për shkak të papastërtisë së viktimës Saime Domazeti, e cila ishte e shtrirë në dhomën e katit të dytë të shtëpisë së të akuzuarës Nazire Abdyli.

Sipas aktakuzës, e akuzuara Abdyli, me një dru të ahut në gjatësi prej 25 cm dhe trashësi 4×2.5 cm, me një pjesë të laminatit, me ngjyrë të bardhë, me gjatësi prej 87 cm dhe trashësi 4×1.2 cm dhe një copë dërrase të llamperisë në gjatësi prej 78 cm dhe trashësi prej 1.2×10 cm, e godet disa herë viktimën në të gjitha pjesët e trupit dhe së fundit në pjesën e majtë të fytyrës duke i shkaktuar gjakderdhje në tru dhe si pasojë e këtij lëndimi më 26 dhjetor 2022, vdes viktima Domazeti.

Për këtë, Nazire Abdyli, u akuzua se ka kryer vepren penale “Vrasje e rëndë”.

E pandehura Abdyli, gjatë seancës së paraburgimit e pranoi se e ka rrahur për vdekje viktimën.

Saime Domazeti, ishte gjetur pa shenja jete në fshatin Kuk të Dragashit.

Ndërkaq, fillimisht rasti ishte hapur si “Vdekje e dyshimtë”.