Gjenden armë dhe pajisje për kriptovaluta në veri

Policia e Kosovës ka njoftuar se ka gjetur armë, pajisje për prodhimin e kriptovalutave dhe sende të tjera të dyshimta gjatë një aksioni në veri të Mitrovicës.

Sipas njoftimit, këto armë janë zbuluar të mërkurën në një shtëpi dhe objekte përcjellëse në rrugën “Kollashini” në Mitrovicën e Veriut.

Nga kontrollet janë konfiskuar:

• Një armë e gjatë (pushkë ajrore);
• Pesë kartela grafike për prodhimin e kriptovalutave;
• 42 minera për prodhim të kriptovalutave me pajisje përcjellëse;
• Një shtëpizë kompjuteri;
• Një karikator revolveri dhe 14 fishekë kalibri 9 mm;
• Një radiolidhje;
• Një kamerë vëzhgimi;
• Një divijar, një vulë metalike dhe një letërnjoftim.

Pajisjet për kriptovaluta do të dorëzohen Doganës së Kosovës, ndërsa hetimet për këtë rast po vazhdojnë.

Policia ka bërë të ditur se në vendin e ngjarjes nuk është hasur asnjë person i dyshuar, por është identifikuar një individ i cili është me interes për t’u intervistuar nga autoritetet.

Lidhur me rastin është informuar Prokurori i Shtetit, i cili ka urdhëruar hapjen e çështjes me dyshimin për veprën penale “Mbajtja në pronësi, kontroll ose posedim i paautorizuar i armëve”.