Ministri Filkov njoftoi se nesër do të fillojnë debatet e ekspertëve për Këshillin Gjyqësor

Ministri i Drejtësisë, Igor Filkov, duke iu referuar raportit të Komisionit Evropian për progresin e vendit tonë në fushën e drejtësisë, tha se ai jep një pasqyrë reale të arritjeve dhe situatës, por edhe një nxitje për të bërë reformat e nevojshme. Sipas Filkovit, reformat në gjyqësor po zhvillohen në përputhje me Strategjinë Zhvillimore Sektoriale për Drejtësi për periudhën 2024-2028 me Planin e saj të Veprimit dhe në periudhën e ardhshme prioritet kyç do të jetë rikonstituimi i Këshillit për monitorimin e zbatimit të Strategjisë Sektoriale të Zhvillimit për Drejtësinë, transmeton Portalb.mk.

“Jemi përpara një prej reformave më domethënëse nga e cila do të varet progresi ynë në rrugën drejt Bashkimit Evropian – Këshilli Gjyqësor dhe Këshilli i Prokurorëve Publikë. Nesër nisin debatet e ekspertëve publikë për projekt-amandamentet dhe plotësimet në Ligjin për Këshillin Gjyqësor të përgatitur nga grupi punues i formuar nga Ministria e Drejtësisë. Ky do të jetë vetëm një nga disa ngjarje për konsultim me publikun profesionist që Ministria e Drejtësisë planifikon të organizojë për të siguruar një proces transparent dhe gjithëpërfshirës që do të kontribuojë në avancimin e kuadrit ligjor që rregullon funksionimin e Këshillit Gjyqësor. Konkluzionet dhe rekomandimet nga tryeza e rrumbullakët do të jenë bazë për përmirësimin e mëtutjeshëm të tekstit të ndryshimeve dhe plotësimeve në Ligjin për Këshillin Gjyqësor. Këto diskutime nuk do të jenë sipërfaqësore. Ato do të jenë gjithëpërfshirëse, do të përfshijnë të gjithë faktorët përkatës dhe do të synojnë të krijojnë zgjidhje që do të garantojnë pavarësinë e këtyre institucioneve. Këshilli Gjyqësor dhe Prokuroria Publike duhet të jenë të lira nga çdo lloj ndërhyrje politike, duke funksionuar vetëm në shërbim të drejtësisë. Këto organe do të reformohen për të punuar me integritetin më të madh, me fokus profesionalizmin dhe respektimin e rreptë të shtetit të së drejtës”, tha ministri i Drejtësisë Igor Filkov në platformën e debatit “Platforma: 100% kushtuar juve” me temën: “Fokus në drejtësi, siguri dhe mbrojtjen”.

Ministri Filkov foli edhe për gjendjen që ka gjetur në Ministrinë e Drejtësisë, buxhetin bosh, irracionalitetin dhe shkatërrimin e plotë të institucionit.

Për “reformën në gjyqësor”, Komisioni Evropian në Raportin e progresit adresoi kritika.

“Njoftimet e qeverisë së re për planet për shpërbërjen e Këshillit Gjyqësor dhe të Prokurorisë janë një shqetësim serioz, pasi veprime të tilla do të cenonin pavarësinë e gjyqësorit. Rritja e deficitit të burimeve njerëzore në gjyqësor ngre shqetësime për ndikimin në cilësinë dhe efikasitetin e drejtësisë”, thuhet në Raportin e Progresit të Komisionit Evropian.

Kryeministri Hristijan Mickoski para pak kohësh shprehu gatishmërinë që të ulet në të njëjtën tryezë me ambasadorët në vend dhe të bisedojë me ta për një zgjidhje më të mirë potenciale që do të ofronin për të ardhmen e Këshillit Gjyqësor dhe të Këshillit të Prokurorëve Publikë si organe gjyqësore-prokuroriale, ndërsa kjo të mos jetë shpërndarja e tyre.

VMRO-DPMNE-ja dhe kryeministri Hristijan Mickoski, ka paralajmëruar shpërbërjen e përbërjes aktuale të Këshillit Gjyqësor dhe reformim në pjesën e zgjedhjes së ardhshme të anëtarëve të tij. Në një prononcim për “Sloboden Peçat” dhe “Fokus” Këshilli tha se gjyqësori, si një nga tre autoritetet, është i pavarur dhe çdo ndërhyrje nga autoritetet e tjera mund të jetë e rrezikshme për demokracinë dhe shtetin e së drejtës.

• LEXO: Mickoski tha se ka shumicën e nevojshme për të miratuar reformat në Këshillat Gjyqësor dhe të Prokurorëve
• LEXO: Mickoski për reformën në Këshillin Gjyqësor: Është bërë praktikë që ambasadorët të përzihen, por unë jam i gatshëm të bisedoj
• LEXO: Përderisa reformat mbeten “nga e hëna”, u lajmërua shpërbërja e këshillave të drejtësisë në RMV