Nga 130.000 libra në Bibliotekën e Tetovës, të qasshëm vetëm 80.000, të tjerët ruhen në depo pasi nuk ka vend pas zhvendosjes
Në bibliotekën “Koço Racin” në Tetovë nuk ka hapësirë për vendosjen e koleksionit ekzistues të bibliotekës dhe librat e rinj, pasi i është marrë hapësira vitin e kaluar dhe është bartur në hapësira më të vogla. Në bibliotekë ka mbi 130.000 libra, por vetëm rreth 80.000 janë në dispozicion të lexuesve, pasi librat e tjerë […]


Në bibliotekën “Koço Racin” në Tetovë nuk ka hapësirë për vendosjen e koleksionit ekzistues të bibliotekës dhe librat e rinj, pasi i është marrë hapësira vitin e kaluar dhe është bartur në hapësira më të vogla. Në bibliotekë ka mbi 130.000 libra, por vetëm rreth 80.000 janë në dispozicion të lexuesve, pasi librat e tjerë vendosen në depo për shkak të mungesës së hapësirës, raporton SDK, transmeton Portalb.mk.
Biblioteka çdo vit e shton fondin e librave, ndaj më së shumti lihen nëpër korridore apo në zyrat e bibliotekës, pasi në më pak se 150 metra katrorë hapësirë, që ka tani biblioteka, nuk ka hapësirë të mjaftueshme për t’i vendosur të gjithë librat në rafte.
“Në vitin 2023, me vendim të Qeverisë së kaluar, nga një pjesë e Qendrës së Kulturës në Tetovë u zhvendosëm në një hapësirë me më pak metra katrorë, për shkak se u ndanë hapësirat për hapjen e zyrave të Bashkimit Evropian. Jemi vendosur në një hapësirë më të vogël, pra nga 200 metra katrorë që kishim atëherë, tani kemi vetëm 146 metra katrorë. Këto hapësira janë më funksionale, por është e ngushtë sepse nuk mban të gjithë librat që kishim në hapësirat e vjetra. Në magazinat e Qendrës së Kulturës kemi ruajtur 45 deri në 50 mijë libra, ndërsa në ambientet aktuale kemi 70 deri në 80 mijë libra. Në vitin 2024, kishim 5200 lexues aktivë që morën mbi 50,000 libra. Ne funksionojmë edhe këtu, sado ngushtë të jetë, por do të jetë gjithnjë e më e vështirë për shkak të nevojës për blerjen e librave të rinj”, tha Mahi Murtezani, u.d drejtor i Institucionit Kombëtar Biblioteka“Koço Racin” Tetovë.
Biblioteka e Tetovës nuk ka as leximore, as sallë me internet, as hapësira tjera për funksionim normal, siç kanë bibliotekat e tjera në Maqedoni. Biblioteka ka kopje të gazetave ditore të vitit 1945, por ato nuk janë të qasshme për lexuesit sepse ndodhen në hapësirat e bodrumit.
“Biblioteka “Koço Racin” në Tetovë e rriti fondin e saj të librave në vitin 2024 duke blerë 470 tituj të rinj, gjegjësisht 1420 libra të rinj dhe 269 libra të rinj të dhuruar nga autorë vendas nga Tetova. Tani bëjmë një rrotullim. I vendosim anash disa libra më pak të kërkuar dhe i ruajmë në hapësirën e shërbimeve, që të ketë vend për titujt e rinj. Po mundohem të jem në kontakt me Ministrinë e Kulturës, konkretisht për disa hapësira në Qendrën e Kulturës që mund t’i përdorim përkohësisht derisa të kalojmë në godinën e re. Prandaj është shumë e rëndësishme për ne dhe apelojmë që objekti i ri të përfundojë sa më shpejt, i cili do të jetë i dobishëm për të gjithë”, thotë drejtori Murtezani.
Godina e re, ku duhet të vendoset Teatri dhe Biblioteka e re, për të cilën është planifikuar 2850 metra katrorë, është duke u ndërtuar prej 10 vitesh. Vitin e kaluar janë ngritur kallëzime penale kundër tre personave që ishin përgjegjës për ndërtimin e Teatrit dhe Bibliotekës së re për keqpërdorim të mjeteve të destinuara për ndërtimin e objektit dhe ndërtimi është lënë në pritje.
Ndërtimi i Objektit të Teatrit dhe Bilbiotekës ishte premtuar që më 6 tetor të vitit 2010, kur ministrja e atëhershme e Kulturës, Elizabeta Kançeska-Milevska e prezantoi zgjidhjen ideore për pamjen e teatrit multifunksional, që duhet të ofrojë teatër, kinema dhe bibliotekë. Gurë-themeli për ndërtimin e këtij objekti u hodh më 28 nëntor të vitit 2014. Punimet janë zhvilluar shumë ngadalë dhe me shumë probleme të cilat Portalb i ka dokumentuar ndër vite.