Nga muaji mars në Shkup do të jenë të disponueshme makinat elektrike me qira

Nga marsi i vitit të ardhshëm do të fillojë të aplikohet shërbimi për ndarjen e automjeteve elektrike pasi sot është nënshkruar një letër për mbështetjen e projektit të kompanisë private sllovene “Avant car”. Letrën e mbështetjes e nënshkruan zëvendëskryeministri dhe ministri i Mjedisit dhe Planifikimit Hapësinor Izet Mexhiti dhe ministrja e Energjisë, Minierave dhe Burimeve Minerale Sanja Bozhinovska, transmeton Portalb.mk.

Për përdorimin e shërbimit, do të jetë e nevojshme të instaloni një aplikacion celular përmes të cilit do të gjendet një automjet i disponueshëm. Për marrjen me qira të një automjeti elektrik do të paguani për minutë dhe kilometër të përshkuar dhe pagesa do të digjitalizohet ose me kartelë pagesore.

Faza e testimit të projektit do të nisë në shkurt të vitit të ardhshëm kur do të bëhet e ditur se sa do të kushtojë marrja me qira.

Sipas pronarit të “Avant Car”, Matej Çer, marrja me qira është më e lirë se përdorimi i shërbimit taksi dhe do të kushtojë mesatarisht nga tre deri në gjashtë euro, ndërsa nga qendra e qytetit deri në aeroportin e Shkupit do të kushtojë nga 10 deri në 15 euro.

Siç njoftoi Cher, për në Shkup janë gati rreth 100 automjete elektrike.

“Makinat janë gati dhe shpresojmë që në të ardhmen të ketë edhe shumë të tjera. Shërbimi i përdorimit të përbashkët të makinave është i thjeshtë. Nevojitet një aplikacion celular që është gjithashtu çelësi i çdo makine që do të jetë në rrugë. Nëpërmjet aplikacionit, gjeni automjet të disponueshëm, e rezervoni atë, zhbllokoni dhe drejtoni atë. Në fund automjeti lihet në një vend parkimi të caktuar dhe mbyllet me aplikacion. Pagesa bëhet me kartë ose me ndonjë metodë tjetër digjitale. Me zbatimin dhe implementimin e sistem për ndarjen e makinave me 100% vetura elektrike me emrin e brendit “Avant2Go” në Slloveni, Kroaci dhe Austri, e tani edhe në Maqedoni, kompania vepron si një pioniere për zbatimin e gjerë të mobilitetit elektrik dhe zbatimin e infrastrukturës së automjeteve elektrike, duke inkurajuar përdorimin dhe ndarjen të automjeteve elektrike”, deklaroi Matej Çer nga Grupacioni Avant Car.

Nëpërmjet këtij projekti, qytetarët do të kenë qasje në transport modern, ekonomik dhe ekologjik ndaj mjedisit që është krijuar për të reduktuar bllokimet e trafikut, ndotjen dhe varësinë nga lëndët djegëse fosile. Ministria e Energjetikës theksoi rëndësinë e instalimit të mbushësve për automjetet elektrike që do të përdorin 100% energji të rinovueshme, ndërsa Ministria e Mjedisit Jetësor theksoi se projekti do të kontribuojë në përmirësimin e cilësisë së ajrit duke ulur ndjeshëm emetimet e CO₂.

“Sot po e vendosim Shkupin në hartën e qyteteve moderne që jo vetëm flasin për qëndrueshmëri, por edhe hedhin hapa të guximshëm drejt saj. Bllokimi, ndotja dhe varësia nga lëndët djegëse fosile nuk janë gjëra me të cilat duhet të pajtohemi. Institucionet publike dhe sektori privat mund të krijojnë së bashku projekte që përmirësojnë drejtpërdrejt realitetin e përditshëm të qytetarëve tanë. Sistemi elektrik “car sharing” është gjithashtu shembull se si teknologjia mund të jetë në shërbim të njerëzve dhe planetit. Me nisma të tilla jo vetëm që përmirësojmë cilësinë e jetës, por ndërtojmë besimin tek sektori privat se ia vlen të investohet këtu”, tha ministrja e Energjetikës, Sanja Bozhinovska.

“Qyteti ynë ka kohë që po përballet me pasojat e ndotjes urbane. Qëllimi është që në këtë mënyrë të ndikojmë drejtpërdrejt dhe të reduktojmë emetimet dhe ndotjen e CO₂, që është prioriteti ynë si ministri. Qytetarët do të kenë mundësi për transport më ekonomik, pa kompromis për mjedisin jetësor. Si Ministri e Mjedisit Jetësor, detyra jonë është të mbështesim zgjidhje të tilla inovative që kanë efekt të drejtpërdrejtë dhe pozitiv në mjedis. Ky projekt është dëshmi se është e mundur të krijohen mjedise urbane më të shëndetshme përmes mbështetjes publike dhe nismës private”, tha Zëvendëskryeministri i Parë dhe ministër i Mjedisit, Izet Mexhiti.

Zbatimi i projektit është planifikuar të fillojë me sigurimin e hapësirave publike dhe private të parkimit dhe instalimin e infrastrukturës së duhur të mbushjes në disa komuna të Shkupit. Në nënshkrimin ishin të pranishëm edhe kryetarët e komunës dhe përfaqësues të Aerodromit, Çairit dhe Gazi Babës. Paralelisht do të organizohen aktivitete për edukimin e opinionit dhe promovimin e përfitimeve të këtij sistemi inovativ.

“Avant car” në RMV do të jetë pjesë e grupit të kompanive “Avant car” me seli në Slloveni, e cila është ndër ofruesit kryesorë të mobilitetit si shërbim në Slloveni, Kroaci, Austri dhe tani Maqedoni.

Ministritë shprehin gatishmërinë e tyre për të bashkëpunuar me komunat, institucionet publike dhe sektorin privat për zbatim më të shpejtë dhe më efikas të kësaj nisme, e cila ka potencial për ta pozicionuar Shkupin si lider në lëvizshmëri të qëndrueshme urbane në rajon.

Kjo nismë do të kontribuojë në përmirësimin e cilësisë së ajrit, uljen e bllokimit të trafikut dhe zhvillimin e zgjidhjeve moderne të transportit që janë efikase energjetike dhe të qasshme për të gjithë qytetarët.