Nis Kuvendi Kombëtar i PD-së, Këlliçi: Të shembim instalacionin pa leje në Kryeministri, Edi Ramën

Demokrati Belind Këlliçi, i cili prezantoi programin e Partisë Demokratike nga Pallati i Kongreseve, u shpreh se “do të shembet instalacioni pa leje në Kryeministri, Edi Ramën”.

Këlliçi u shpreh në fjalë të tjera se e gjithë kjo do të ndodhë vetëm falë votës së shqiptarëve për Partinë Demokratike, por dhe denoncimeve të kësaj force politike në institucionet e drejtësisë.

Referuar kësaj të fundit, demokrati kujtoi se Partia Demokratike ka bërë denoncime të shumta, si ajo e “5D”, por dhe asaj që ai e quajti si “kështjella me rërë e Bashkisë Tiranë”, për ta lidhur kështu me arrestimin e kryebashkiakut Erion Veliaj.

“Ne tashmë kemi vendosur të heqim të keqen e madhe që i ka rënë Shqipërisë, që quhet Edi Rama.
Një fjalë e kam për të gjithë, askush nuk besoi dy vite më parë per çmonimtimn e grupit të strukturuar kriminal të Bashkisë. Shumëkush qeshi, shumëkush tha tërhiqu, shumëkush madje pati kurajon të kërcënojë. Por ja ku jemi sot, me një premtim të mbajtur të Partisë Demokratike. Ju premtojmë, se siç çmontuam kështjellën e rërës së Bashkisë, me këtë program që ne ofrojmë, me votën tuaj, do shembim instalacionin pa leje në kryeministri, që quhet Edi Rama”, tha Këlliçi.

Lidhur me programin e Partisë Demokratike, Këlliçi tha se do të ketë minimumin jetik prej 200 euro, paga minimale 500 euro ndërsa ajo mesatare 1200 euro, shëndetësi dhe arsim dinjitoz.