Prej premtimeve në prolongime: Ligjit për përfaqësim të drejtë nuk i shihet drita në fund të tunelit
Nuk ka asgjë të re për Ligjin për përfaqësim të drejtë që pritet ta zëvendësoj mekanizmin e “balancuesit”, që u shfuqizua nga Gjykata Kushtetuese. Kryeministri i Hristijan Mickoski kërkon durim, me pretendim që ligji të jetë sa më preciz dhe adekuat pa i lënë hapësirë kushtetueses për kundërshtim eventual, ndërkaq VLEN siguron se ligji është […]
Nuk ka asgjë të re për Ligjin për përfaqësim të drejtë që pritet ta zëvendësoj mekanizmin e “balancuesit”, që u shfuqizua nga Gjykata Kushtetuese. Kryeministri i Hristijan Mickoski kërkon durim, me pretendim që ligji të jetë sa më preciz dhe adekuat pa i lënë hapësirë kushtetueses për kundërshtim eventual, ndërkaq VLEN siguron se ligji është në fazën finale tash e disa muaj. Sot, temë kryesore nga VLEN nuk është ligji por apetitet e subjekteve brenda saj për kulaçin e zgjedhjeve lokale, shkruan Portalb.mk.
Hera e fundit kur në opinion është përmendur Ligji për përfaqësimin të drejt dhe adekuat ishte data 26 shkurt, kur në një paraqitje televizive i pari i qeverisë Hristijan Mickoski tha se si ide dhe koncept ligji ka qenë gati që në dhjetor të vitit të kaluar (2024), por tani të njëjtin po e konsultojnë edhe me ekspertë të së drejtës kushtetuese, që mos të ketë hapësirë që ligji të kontestohet nga Gjykata Kushtetuese.
Në pyetjen se a do thotë kjo se do të zgjasë shumë, derisa të presim mendim nga Komisioni i Venedikut, Mickoski u përgjigj:
“Sa shpejt do jetë, tani nuk do jem sekundant që do të vendos nëse do të jetë pas një jave, një muaji apo gjashtë muajve, … mund të jetë më shumë se një vit. Por, thelbi është të arrijmë në një zgjidhje që do të na garantojë aktualisht përfaqësim të vërtetë të drejtë, por edhe kushtetutshmëri”.
Udhëheqës të grupit punues për ligjin në fjalë janë koalicioni VLEN, respektivisht zëvendëskryeministri i angazhuar për Politika të Qeverisjes së Mirë, Arben Fetai, dhe zëvendëskryeministri Izet Mexhiti.
“Diskutimet janë në fazën përfundimtare. Janë angazhuar njohës të së drejtës kushtetuese”, është kjo gjithçka që zbulohet nga ana e VLEN.
Ndryshe, pas shfuqizimit të “Balancuesit”, VLEN shpejtonte me deklarata të njëpasnjëshme se kanë ligj që do të të rregullojë përfaqësimin etnik nëpër institucione. Por, me kohë nisën të ndryshojnë fjalët dhe ligji prolongohet.
Së fundmi temë aktuale është turbulenca politike brenda partive të koalicionit VLEN, ku subjektet kanë problem mbi marrëveshjen për zgjedhjet lokale.
Profesoresha universitare Besa Kadriut, ish nënkryetare e Lëvizjes Besa, në TV21 tha se te pala shqiptare në koalicion qeverisës po sheh regres. Sipas saj, shqiptarët morën pak hise dhe u shtypën.
“Morën pak dhe unë kam përshtypjen që u shtyp qëndrimi për të dhënë një kahje tjetër devijimi të asaj çështje për të cilën ne kemi brohoritur vite me radhe. Ndryshim, tërheqje nga pjesa e pushtetit të asaj që sot e kemi opozitë sepse konsideruam që ka shkelje madhore në korrupsion, devijim qëndrimesh të cilat ishin shumë jetike për shqiptarët dhe përfaqësimin adekuat edhe pse tash, lëre që ne nuk arritëm të shkojmë një hap para por unë po shoh tani regres, se edhe të arriturat që i kanë bërë subjektet para nesh, nuk duhet t’i mohojmë. Nuk nuk mund të themi unë jam në kundërshtim me ideologjinë e BDI-së por këtë gjë duhet t’ia mohoj se nuk e ka bërë, vetëm pse unë dëshiroj të përfitoj politikisht”, tha Kadriu.
Profesoresha Kadriu ka bërë thirrje për ndryshim, për vepra konkrete të kapshme për qytetarët. Sipas saj, VLEN do ishte shumë më i arsyeshëm kur do të flet me veprime praktike konkrete.
Në Republikën e Maqedonisë së Veriut nuk ka mekanizëm juridik që do të mbrojë shqiptarët apo etnitetet tjera që të mos diskriminohen gjatë punësimit. Partneri shqiptar në koalicionin qeverisës, VLEN që nga ardhja në pushtet siguron se po punohet në Ligj që do jetë më në nivel se balancuesi, ndërkaq kryeministri Hristijan Mickoski kërkon durim që ligji i radhës të mos jetë vetëm një implant që duhet pastaj të hidhet, por një zgjidhje ligjore adekuate dhe në përputhje me Kushtetutën e Maqedonisë së Veriut.
Gjykata Kushtetuese e RMV-së më 9 tetor 2024 me shumicë votash vendosi për shfuqizimin e instrumentit “Balancues”, i cili deri tani ka rregulluar përfaqësimin e drejtë të komuniteteve në administratën shtetërore. Pas këtij vendimi, për punësimet në administratën publike nuk po mbahet llogari për përkatësinë etnike.
Lënda për shfuqizimin e tij u hap pas një iniciative të dorëzuar nga përbërja e vjetër e Komisionit Shtetëror për Parandalimin e Korrupsionit (KSHPK) më 11 janar 2024, sepse, sipas tyre, me të bëhen abuzime gjatë punësimit.
