Seanca për zgjedhjen e qeverisë së re të Maqedonisë së Veriut është caktuar të shtunën

Seanca e shtatë plenare e Kuvendit është caktuar të shtunën, më 22 qershor, në orën 11:00, e vetmja pikë e propozuar në rendin e ditës është zgjedhja e qeverisë së re në vend, transmeton Portalb.mk.

Propozues i përbërjes së qeverisë është mandatari, deputeti dhe lideri i VMRO-DPMNE-së, Hristijan Mickoski.

Ai dje ia ka dorëzuar kryeparlamentarit dhe deputetëve përbërjen e propozuar të qeverisë, si dhe programin e punës së qeverisë së ardhshme. Nga përbërja e propozuar e qeverisë, të cilën Mickoski e bëri të ditur sërish dje për media, duket se do të jenë pesë zëvendëskryeministra, por pritej që ata të jenë katër.

Sipas Rregullores së Kuvendit, seanca për zgjedhjen e qeverisë zgjat maksimumi dy ditë. Mandatari u shpjegon deputetëve programin dhe përbërjen e propozuar të qeverisë. Votimi për përzgjedhjen e përbërjes së re të qeverisë kryhet jo më vonë se ora 24:00.

Qeveria zgjidhet nëse pro ka votuar shumica e numrit të përgjithshëm të deputetëve.

Hristijan Mickoski më 18 qershor në Kuvendin e Maqedonisë së Veriut ka dorëzuar përbërjen për formimin e Qeverisë së re të Maqedonisë së Veriut e cila do të përbëhet nga VMRO-DPMNE, VLEN dhe ZNAM.