Taravari: Deri të premten do të kemi marrëveshje për qeverinë e re

Kryetari i Komunës së Gostivarit, Arben Taravari, pret që deri në fund të javës së ardhshme të arrihet marrëveshje për qeverisjen e ardhshme. Në pyetjet e gazetarëve në një ngjarje në Gostivar, ai theksoi se ka një atmosferë pozitive në mes të grupeve punuese të VLEN-it dhe VMRO-DPMNE-së, transmeton Portalb.mk.

“Shpresoj se deri në fund të javës së ardhshme do të kemi një marrëveshje përfundimtare me programin e Qeverisë dhe me ndarjen e portofoleve, përkatësisht kush dhe ku do të jetë ministër. Ne si kryetarë të partive kemi pasur dy takime, grupet punuese janë duke punuar intensivisht, shpresoj deri të hënën do të dalim me një program të përbashkët dhe deri të premten do të kemi marrëveshje përfundimtare mes VLEN-it dhe VMRO-DPMNE-së, praktikisht një marrëveshje për qeveri e re”, tha Taravari.

Ai i ka dërguar mesazh edhe kryetarit të Gjykatës Administrative, për të cilin tha se bën presion ndaj gjyqtarëve kur vendosin për rastet e parregullsive zgjedhore.

“Unë do t’i dërgoja një mesazh kryetarit të gjykatës që të mendojë se nuk është mirë të bësh presion mbi gjyqtarët. Tashmë ka kaluar koha kur ata mund të bënin presion dhe do të ketë një qeveri të re që nuk do të lejojë presione të tilla për vendime”, tha Taravari dhe sqaroi se gjykata duhet të marrë një vendim të drejtë.

Lëvizja Demokratike nga koalicioni VLEN, më 16 maj njoftoi në lidhje me disa çështje që u diskutuan në takimin e grupeve të punës të koalicionit VLEN dhe VMRO-DPMNE-së.

“Gjatë udhëheqjes së tillë të përbërjes së ardhshme qeveritare të respektohen parimet e dakorduara të veprimit, dinamizimi i fuqishëm i integrimeve në BE, lufta e pakompromis kundër korrupsionit dhe krimit dhe reformat ekonomike për një standard më të lartë jetese”, njoftoi për disa nga prioritetet e koalicionit qeveritar.

Ata njoftuan që sot në selinë e VMRO-DPMNE-së u zhvillua takim me mes grupeve të punës nga koalicioni VLEN dhe VMRO-DPMNE, në lidhje me formimin e koalicionit qeveritar.

Kujtojmë se sipas rezultateve fillestare zyrtare për zgjedhjet parlamentare të shpallura nga KSHZ, Koalicioni “Maqedonia juaj” i udhëhequr nga VMRO-DPMNE ka fituar 58 mandate parlamentare, e ndjekur nga Koalicioni “Fronti Evropian” i udhëhequr nga BDI me 19 mandate parlamentare, Koalicioni Për një të ardhme evropiane të udhëhequr nga LSDM me 18, Koalicioni VLEN me 13 dhe Lëvizja ZNAM për Maqedoninë tonë dhe të majtën pas gjashtë mandateve parlamentare.

• LEXO: VLEN-i i tregoi disa çështje që u diskutuan në takimin me VMRO-DPMNE-në