Faturat e rrymës mbeten sfidë për UKM-në, kërkohet zgjidhje

Faturat e larta të energjisë elektrike janë sfidë për Universitetin Shën Kirili dhe Metodi në Shkup (UKM). Këtë e theksoi rektorja e UKIM-së, Biljana Angellova në takimin me ministren e Energjetikës, Minierave dhe Burimeve Minerale, Sanja Bozhinovskën, transmeton Portalb.mk.

Siç njofton Ministria e Energjetikës, rektorja Angellova theksoi rëndësinë e stabilitetit energjetik për funksionimin e rregullt të universitetit, duke theksuar se faturat e larta të energjisë elektrike paraqesin barrë të konsiderueshme financiare. Rektorja tregoi se UKM po kërkon mënyra për të optimizuar kostot e energjisë elektrike, si dhe zgjidhje afatgjatë dhe të qëndrueshme.

Ministria thotë se mbi 200 institucione publike paguajnë aktualisht faturën mesatare ditore të energjisë elektrike, gjë që rëndon ndjeshëm buxhetin e tyre.

“Edhe pse Maqedonia menaxhon me sukses shkëmbimin e saj të energjisë elektrike, i cili funksionon përmes Operatorit kombëtar të Tregut të Energjisë Elektrike (MEMO), për më shumë se një vit e gjysmë, shumica e institucioneve shtetërore dhe publike, përfshirë shkollat, spitalet dhe ndërmarrjet komunale, po përballen me sfida serioze. Këto institucione janë të detyruara të blejnë energji elektrike në tregun e lirë, duke paguar me çmimet e vendosura në bursën HUPEX në Hungari”, thuhet në deklaratë.

Ministrja Bozhinovska theksoi gatishmërinë e ministrisë që drejton për të shqyrtuar mundësitë për “zbutjen e kësaj gjendjeje”.

“Ministrja theksoi se zgjidhja e këtij problemi është thelbësore për përmirësimin e qëndrueshmërisë energjetike të sektorit publik dhe për lirimin e fondeve që mund të investohen në projekte të tjera zhvillimore”, thuhet në njoftimin e Ministrisë së Energjetikës.

Paraprakisht, në një intervistë për Meta.mk, kryetari i Unionit Studentor Universitar të UKM-së, Aleksandar Nikollovski, tha se Ministria e Arsimit dhe Shkencës (MASH) nuk ia ka paguar universitetit mjetet për shpenzimet e energjisë elektrike, për këtë arsye ka pasur rrezik që UKM të mbetet pa energji elektrike.