Gerapetritis: Marrëveshja e Prespës ka karakter të detyrueshëm dhe detyrime që duhet të respektohen plotësisht

Marrëveshja e Prespës është marrëveshje ndërkombëtare që ka karakter të detyrueshëm, i obligon palët dhe krijon obligime të cilat duhet të respektohen plotësisht, deklaroi ministri i Jashtëm i Greqisë, Giorgos Gerapetritis, pas takimit me kolegun francez Stephane Sejourne, njofton korrespondent i MIA-s nga Athina, përcjell FLAKA.

Kreu i diplomacisë greke tha se me Sejourne ndër të tjera është diskutuar për “të ardhmen e Europës, e cila lidhet drejtpërdrejt me zgjerimin”.

“Më shumë se 20 vjet pas agjendës Solna, Greqia dhe Franca mbeten mbështetëse të fuqishme të zgjerimit me vendet e Ballkanit Perëndimor. Por një parakusht i domosdoshëm për sukses në zgjerim është respektimi i shtetit të së drejtës dhe i të drejtave të pakicave dhe respektimi universal, jo selektiv, për të drejtën ndërkombëtare. Në veçanti për Marrëveshjen e Prespës, e përsëris se si marrëveshje ndërkombëtare ka karakter të detyrueshëm, lidh palët dhe krijon detyrime që duhet të respektohen plotësisht”, tha Gerapetritis.

Dy ministrat diskutuan për situatën në Ukrainë dhe Lindjen e Mesme, bashkëpunimin dypalësh në disa fusha, por edhe çështjen e emigrantëve, për të cilën kreu i diplomacisë greke tha se “Greqia thekson vazhdimisht nevojën për një ndarje të drejtë të barrës brenda kornizës të marrëveshjes së migracionit dhe azilit”.

Në të njëjtën kohë, ai shtoi se duhet të merren edhe me “dimensionin e jashtëm të çështjes së emigrantëve”, të koordinojnë përpjekjet për të luftuar rrjetet e kontrabandistëve dhe diskutuan për koordinimin e aktiviteteve.

Shefi i diplomacisë franceze në deklaratën pas takimit me Gerapetritis iu referua bashkëpunimit në mbrojtjen civile dhe ballafaqimit me krizën klimatike dhe ndihmën reciproke, ai përmendi bashkëpunimin dypalësh ushtarak, duke thënë se lidhjet në fushën konkrete janë forcuar veçanërisht dhe ai tha se marrëdhëniet mes dy vendeve karakterizohen me solidaritet, besim dhe afërsi.

“Dy vendet tona janë vendosur me vendosmëri për stabilitetin, sigurinë dhe paqen në kuadër të detyrimeve tona në Bashkimin Evropian dhe NATO. Së bashku, të dyja vendet kontribuojnë në mbrojtjen evropiane dhe sigurinë euroatlantike, dhe shpresoj se ne mund të vazhdojmë ambicien tonë të përbashkët për të forcuar mbrojtjen evropiane dhe autonominë strategjike të Evropës në muajt e ardhshëm, natyrisht nga pozicione të tjera, por nga Franca kjo do të ekzistojë gjithmonë”, tha Sejourne, duke theksuar se bashkëpunimi greko-francez është i domosdoshëm dhe diçka që duhet ruajtur.

Ai shtoi se pikëpamjet e dy vendeve përkojnë në një sërë temash, duke përmendur nevojën e zbatimit të marrëveshjes evropiane për migracionin.

Mëngjesin e sotëm, Séjournay u emërua Komisioner Evropian francez me vendim të Presidentit të Francës, Emmanuel Macron. FLAKA

The post Gerapetritis: Marrëveshja e Prespës ka karakter të detyrueshëm dhe detyrime që duhet të respektohen plotësisht appeared first on Flaka, në çdo lajm... .