Mbi 20,000 vullnetarë do të pastrojnë Maqedoninë e Veriut nga mbeturinat më 9, 10 dhe 11 maj

Për herë të pestë, Maqedonia do të jetë mikpritëse e eko-aksionit më të madh vullnetar, Pastrim gjeneral fundjave, i cili do të zhvillohet më 9, 10 dhe 11 maj. Aksioni, i organizuar nga Man & Mountain, po zbatohet me mbështetjen e BNJVL-së, Kryqit të Kuq, Ministrisë së Mjedisit, si dhe shumë institucioneve dhe organizatave të tjera. Në më shumë se 500 lokacione në të gjitha komunat, mbi 20,000 vullnetarë do të kontribuojnë për një mjedis më të pastër dhe më të shëndetshëm. Do të përfshihen mbi 600 organizata, institucione, shkolla, kompani, shoqata pensionesh dhe qytetare, institucione publike, komunitete lokale dhe parqe kombëtare, transmeton Portalb.mk.

Fillimi zyrtar do të shënohet në Akuadukti Shkup më 9 maj në orën 9:00, ku më shumë se 200 vullnetarë do të pastrojnë rrethinat e këtij vendi të rëndësishëm kulturor dhe historik.

Në partneritet me Ministrinë e Arsimit dhe Shkencës dhe UNICEF-in, këtë vit aksioni po zgjerohet në shkolla për herë të parë përmes projektit edukativ “Eko orë”. Nxënësve do t’u ngarkohet detyra të angazhohen në aktivitete mjedisore për tre ditë rresht:

• 9 maj – pastrimi i shkollave me mësuesit,
• 10 maj – pastrimi i shtëpive dhe i mjedisit përreth me familjet,
• 11 maj – pastrimi i parqeve dhe zonave të piknikut.

Çdo ekip do të duhet të dokumentojë me fotografi dhe të paraqesë rezultatet në orën e parë të mësimit pasues.

Aksioni nuk mbaron këtu. Bazuar në memorandumin 10-vjeçar me Ministrinë e Bujqësisë dhe Pyjeve Kombëtare, faza e dytë – “Sonçeva gora”, e dedikuar për pyllëzimin, do të zhvillohet në nëntor. Për çdo 10 kilogramë mbeturina të mbledhura, mbillet një pemë. Deri më tani, mbi 120,000 fidanë janë mbjellë në vende të ndryshme në të gjithë vendin.

Në katër vitet e fundit:

• U mblodhën mbi 1 milion kilogramë mbeturina,
• Janë përfshirë më shumë se 44,000 vullnetarë,
• Janë pastruar mbi 1000 lokacione,
• Janë mbjellë mbi 120,000 drunj.

Pastrim gjeneral fundjave është bërë simbol i vetëdijes kolektive ekologjike dhe përgjegjësisë qytetare. Kjo ngjarje unike, jo vetëm në Maqedoni, por edhe në Ballkanin Perëndimor, dërgon një mesazh të fuqishëm: ndotja është armik i përbashkët dhe zgjidhja qëndron në veprimin e përbashkët.