Për 10 muaj Prokuroria në Pejë konfiskoi dhe sekuestroi 106 automjete

Prokuroria Themelore në Pejë ka njoftuar se për 10 muaj ka konfiskuar dhe sekuestruar 106 automjete.

“Prokuroria Themelore në Pejë, njofton opinionin publik se gjatë periudhës kohore janar- tetor të vitit 2025 , me kërkesë të prokurorit të shtetit janë konfiskuar me vendim përfundimtar të gjykatës, gjithsej 63 automjete, përfshirë vetura, kamion, kombi dhe makineri tjera të punës të cilat janë përdorur apo përfituar përmes veprave penale.”

Automjetet e konfiskuara do të shiten dhe mjetet do të shkojnë në buxhetin e shtetit.

“Të konfiskuara me kërkesë të prokurorit të shtetit dhe urdhër përfundimtarë të gjykatës përfshihen vetura luksoze të markave të ndryshme të cilat kapin vlerë të madhe, si dhe është obliguar Agjencia për Administrimin e Pasurisë së Sekuestruar dhe Konfiskuar për shitjen e të njëjtave dhe të gjitha mjetet të derdhen në buxhetin e Republikës së Kosovës.”

“Kurse, 43 automjete, kryesisht vetura të markave të ndryshme janë sekuestruar me kërkesë të prokurorit të shtetit dhe të njëjtat dyshohen se janë përfituar apo shfrytëzuar për kryerjen e veprave penale. Ndërsa, 13 automjete janë kthyer pronarëve të tyre pas sekuestrimit si rezultat i hetimeve të ndërmarra nga ana e prokurorit të shtetit.”