RMV, kuvendi studentor i UKM-së me reagim ndaj rritjes së shpenzimeve: Arsimi duhet të mbetet i qasshëm për të gjithë
Si Kuvend studentor universitetar, i kuptojmë sfidat me të cilat përballet Universiteti i Shën “Kirili dhe Metodi” (UKM) në trajtimin e kostove. Megjithatë, mendojmë se pjesa më e madhe e këtyre kostove financiare nuk duhet të transferohen tek studentët, por duhet të mbulohen nga Ministria e Arsimit dhe Shkencës (MASH), Ministria e Financave, si dhe […]
Si Kuvend studentor universitetar, i kuptojmë sfidat me të cilat përballet Universiteti i Shën “Kirili dhe Metodi” (UKM) në trajtimin e kostove. Megjithatë, mendojmë se pjesa më e madhe e këtyre kostove financiare nuk duhet të transferohen tek studentët, por duhet të mbulohen nga Ministria e Arsimit dhe Shkencës (MASH), Ministria e Financave, si dhe fonde të tjera shtetërore, transmeton Portalb.mk.
Kështu thuhet në reagimin e Kuvendit Studentor Universitar të UKM-së (KSU UKM) pas njoftimit se studentët e disa prej fakulteteve të universitetit më të madh shtetëror do të kenë shpenzime të shtuara gjatë regjistrimit në këtë semestër dimëror.
Meta.mk dhe Portalb.mk raportuan javën e kaluar se UKM po “harmonizon” tarifat për studentët, që do të thotë kosto më të larta për disa studentë.
Nëse vitin e kaluar studentët e Fakultetit Filozofik në Shkup gjatë regjistrimit në semestrin dimëror kanë paguar 1.150 denarë shtesë, përveç pagesës për pjesëmarrje, këtë vit do të paguajnë 3.650 denarë, që është një rritje prej 2.500 denarë. Sipas informacioneve të Meta.mk, rritje të caktuara ka edhe në Fakultetin Ekonomik dhe Juridik.
Në udhëzimet për regjistrim në semestrin e ri që studentët e Fakultetit Filozofik e kanë marrë me email, përveç shpenzimeve obligative prej 750 denarë për aktivitete informative, kulturore dhe sportive (AIKS) dhe 100 denarë për regjistrim dhe certifikim të semestrit, studentët vunë re dy pika të reja që duhet të kryejnë pagesën: 2000 denarë për “burime online për realizimin e programit studimor” dhe 800 denarë për “Blerje të mjeteve materiale për realizimin e programit studimor”.
KSU UKM në reagimin e saj të publikuar dje thotë se çmimet dhe kostot nuk duhet të ndryshojnë dukshëm nga fakulteti në fakultet.
“Edhe duke marrë parasysh faktin se çdo njësi funksionon në mënyrë të ndryshme dhe ka burime të ndryshme për çdo student, “kostoja” e mundshme e procesit të digjitalizimit, të cilën studentët e kanë kërkuar prej vitesh, nuk duhet të jetë dukshëm e ndryshme nga fakulteti në fakultet. Kryesisht sepse është një universitet publik në të cilin të gjithë studentët janë të barabartë, pavarësisht se në cilën njësi individuale kanë vendosur të studiojnë. Ne i perceptojmë veprime të tilla si një goditje të drejtpërdrejtë ndaj standardit studentor, të cilin me kaq mundim e kemi ndërtuar dhe ngritur me vite të tëra”, tha KSU UKM.
Nga aty vlerësojnë se është e nevojshme që shpenzimet për realizimin e programeve të studimit dhe për funksionimin e universitetit të rimbursohen në tërësi nga buxheti i shtetit.
“Njësitë e universitetit, së bashku me rektoratin dhe organizatat studentore, nuk duhet ta bëjmë betejën për burime shtesë financiare me studentët (gjegjësisht barra financiare të jetë mbi kurrizin e studentëve), por me institucionet përgjegjëse për financimi i arsimit të lartë në vend (në përputhje me Ligjin për Arsimin e Lartë)”, thuhet në reagimin e kuvendit studentor.
“Arsimi duhet të mbetet i qasshëm për të gjithë, pavarësisht sfidave ekonomike”, shtuan studentët.
Nga KSU UKM propozojnë uljen e kostove të reja të vendosura për burimet online dhe materiale dhe gjetjen e mënyrave alternative të financimit, më pas një Fond për studentët e kategorive vulnerabël që do t’u mundësonte këtyre studentëve të përjashtohen nga kostot shtesë, si dhe një bazë të dhënash elektronike të tekste dhe shkrime, përmirësimi i kushteve infrastrukturore dhe higjienike e të tjera.
Ata kërkojnë nga kuvendi studentor të unifikojë kostot shtesë ndaj të cilave janë të ekspozuar studentët e fakulteteve të ndryshme, si dhe të sigurojë një buxhet të avancuar për kuvendet studentore të fakulteteteve si përfaqësues zyrtarë të studentëve para organeve më të larta.
