Taravari: Kur të punohet pas shpine, duhet të bësh disa lëvizje për rezultate më të mira

Ministri i Shëndetësisë, Arben Taravari në një intervistë për Kanal 5 ka folur për shumë çështje, nga tenderi për parkungun në Qendrën Klinike e deri te zhvillimet në VLEN. Ai theksoi se tenderi për parkingun në Qendrën Klinike “Nënë Tereza” nuk ka qenë në katër sy siç pretendohet në publik, dhe se i njëjti ka kaluar të gjitha procedurat. Sipas Taravarit, afati për menaxhim me parkingun nuk ishte 20 vjet, siç është paraparë me studimin e fizibilitetit. Në tender, siç bëri të ditur, ka pasur kusht për ofertuesin që ta shfrytëzojë parkingun derisa në atë lokacion është Qendra Klinike, e cila aty më shumë se 7-8 nuk do të jetë, transmeton Portalb.mk. 

“Kompania Gjoka Construction ishte kompania e vetme që aplikoi në tender dhe ne nuk mund të detyrojmë askend të konkuroj kur ata kanë parasyshë se Qendra Klinike më së shumti edhe 7-8 vite do të jetë aty. Sa i përket raporteve personale nuk kam as një lidhje personale, as i njoh as i di kush janë Gjoka Construction”, pohoi Taravari.

Qeveria në seancë më 20 gusht të vitit të kaluar mori vendim që të ndërtohen garazhe të montuara në kate në Qendrën Klinike me partneritet publik-privat dhe formoi Komision për zbatimin e procedurës. Me parkingun në Qendrën Klinike për momentin menaxhon N.P “Parkingu i Qytetit” – Shkup.

Kompania nga Shqipëria “Gjoka Construction” ishte kompani e vetme e cila konkuroi në ternderin për ndërtimin e parkingjeve në Qendrën Klinike, por tenderi u anulua, ndërsa afati për ndërtimin e garazheve të montuara në kate nëse nënshkruhej marrëveshja, sipas gjitha gjasave nuk kalonte më shumë se një vit.

Taravari foli edhe për zhvillimet e fundit në koalicionin VLEN për çka la të nënkuptohet se atij i është punuar pas shpine, ndaj edhe i ka bërë lëvizjet që i ka bërë.

“Të gjithë ata që na përkrahin e dinë se çdo herë kam tentuar të bëj më të mirë për të gjithë. Nuk bëhet fjalë për interesa personale, pasi shumë lehtë do ta kisha tejkaluar, por bëhet fjalë për interesin e përgjithshëm. Nëse dikush tenton të të zvogëloj sa më shumë dhe të të punoj pas shpine, duhet të bësh disa lëvizje të cilat do të tregosh se vlen dhe të arrish rezultat më të mirë”, u shpreh kryetari i ASh-së, Arben Taravari.

Ai foli edhe rreth mundësisë së riorganizimit të shtetit dhe Kushtetutës. Taravari është shprehur se secili shtet duhet të organizohet sipas rrethanave aktuale në atë vend.

“Mendoj se në Maqedoni më mirë do të ishte të kishim 25 komuna, dhe jo 70 komuna siç i kemi tani. Ne duam ose jo, por nëse jemi duke ecur drejt BE-së, këto çështje duhet t’i mbyllim. Por komuna me 3.000-4.000 banorë nuk mendoj se janë funksionale. Sa i përket stemës, të gjithë vendet e ish-Jugosllavisë, e kanë ndërruar, vetëm Maqedonia nuk e ka ndërruar. E shoh se edhe te partitë politike ka gatishmëri për ndërrimin e stemës. Gjithashtu edhe 20 përqindëshi nga Kushtetuta duhet të hiqet”, u shpreh Taravari.

Taravari shtoi se sa i përket himnit ua len ekspertëve të vendosin se si duhet të ndërrohet, ndërsa për himnin dhe stemën, duhet të shihet se si është edhe interesi te partitë tjera dhe të vijnë në një përfundim më të mirë.

Ai ka deklaruar edhe se pa marrë parasysh se si do të rrjedhin situatat politike, gjatë kësaj jave do të takohet me kryeministrin Mickoski. Taravari tha se me Mickoskin njihen që nga viti 2017, kur ai ishte Sekretar i Përgjithshëm i partisë.

“Deri më tani kam përvojë të mirë të bashkëpunimit, pa marrë parasysh në cilën anë kemi qenë”, u shpreh Taravari.

Ai shtoi se kanë bashkëpunuar në dy cikle zgjedhore në zgjedhjet lokale.

Taravari ka folur rreth rejtingut të ASH-së dhe partive të tjera në opinion. Ai tha se ASH-ja, sipas anketave të brendshme të partisë del partia më e madhe brenda VLEN-it.

“Në tre anketat e ekzekutuara ASH-ja është partia më e madhe brenda koalicionit. Mirë është që ASH-ja, përkundër partive të tjera në VLEN, ka strukturë të mirë dhe të organizuar nga Likova deri në Strugë. Atje ku kërkohet vota shqiptare”, u shpreh Taravari.

Sa u përket vulave, Taravari, tha se partinë nuk e bëjnë vulat, pasi edhe Menduh Thaçi, i ka vulat e partisë,  por sa ka mbështetje është çështje tjetër.

Koalicioni VLEN së fundmi u përça. AASH-ja e Taravarit vendosi që në zgjedhje të garojë me lista të veçanta. Ai pretendonte të mbetet në kuadër të koalicionit por të garojë vetë dhe të bashkëpunojë edhe me parti të tjera, si BDI apo VMRO. Të nesërmen pas këtij vendimi, u mblodhën krerët e VLEN-it, të cilët konstatuan se Taravari, me këtë veprim e ka vetëpërjashtuar veten nga koalicioni. Tani në pikëpyetje mbetet fati i dy grupeve për qëndrim më tej në Qeveri. Muajin e fundit në disa paraqitje Mexhiti dhe Kasami ia kanë treguar derën e daljes nga qeveria ASH-së, por kjo e fundit thotë se gjithçka varet nga vendimi i Mickoskit.

• LEXO: VLEN-i dhe VMRO-DPMNE-ja me paralajmërime për fitore të mëdha në zgjedhjet lokale
• LEXO: Taravari e Snopçe nuk dalin nga qeveria pa aminin e Mickoskit
• LEXO: Fetai: ASH -Taravari mbetet në qeveri sikur nuk ka ndodhur asgјë
• LEXO: RMV, a ka gjasa të mbahen zgjedhje të parakohshme parlamentare bashkë me zgjedhjet lokale?
• LEXO: Mexhiti: Nga java e ardhshme do të fillojnë procedurat që VLEN-i të bëhet parti politike
• LEXO: Taravari: ASh në zgjedhjet lokale do të dalë me lista të veçanta për këshilltarë, të hapur për bashkëpunim edhe me partitë tjera