Zgjedhjet në Himarë, reagon Ilir Meta: Përjashtimi i mijërave qytetarëve nga votimi është një krim i shëmtuar elektoral!

Presidenti i Partisë së Lirisë, Ilir Meta ka reaguar pasditen e sotme me një status në rrjetet sociale për zgjedhjet e pjesshme lokale që po mbahen në Bashkinë e Himarës.

Meta shkruan se përjashtimi i mijërave qytetarëve nga e drejta e votës me pretekstin se ju ka mbaruar afati i mjetit të identifikimit është një krim i shëmtuar elektoral i Edi Ramës.

Gjithashtu ai u bën thirrje qytetarëve himariotë që të vrapojnë në këto orë të mbetura drejt qendrave të votimit për të mbrojtur Himarën dhe ndëshkuar grabitësit e tokave të tyre.

Reagimi i Ilir Metës:

Përjashtimi i qëllimshëm antikushtetues i 6157 qytetarëve të Bashkisë së Himarës nga e drejta e votimit, me preteksin e skadimit të dokumentave të identifikimit është një krim i shëmtuar elektoral i Edi Ramës në funksion të grabitjes së zgjedhjeve.

Shtimi në listat e votimit të qindra qytetarëve nga bashki të tjera, ndryshimi i programuar i qendrave të votimit, ndarja preferenciale për qëllime elektorale të titujve të pronësisë, zbarkimi i të gjithë makinerisë së narkoshtetit në Himarë, me banditë, presione, shantazhe dhe para të pista janë akte mafioze antiligjore që akuzojnë rëndë drejtpërdrejt Edi Ramën dhe SPAK që mbron krimet e tij elektorale.

Duke dënuar me forcë aktet që synojnë të shkatërrojnë standardet e zgjedhjeve të lira e të ndershme në Himarë, u bëj thirrje të gjithë himariotëve të vrapojnë në këto orë të mbetura drejt qendrave të votimit për të mbrojtur Himarën dhe ndëshkuar grabitësit e tokave të tyre.