Drejtori shpalosi detaje të tjera rreth keqpërdorimeve në Lotarinë Shtetërore
Përveç blerjes së papritur të terminaleve, që janë paguar me çmim dyfish më të lartë, në lotarinë shtetërore ekzistojnë dyshime edhe për prokurime dhe tenderë të tjerë të dyshimtë. Drejtori i këtij institucioni, Aleksandar Klimovski thotë për Alsat se organet e zbatimit të ligjit, i kanë marrë të gjitha dokumentet dhe ato janë vendosur tashmë nën llupën […]
Përveç blerjes së papritur të terminaleve, që janë paguar me çmim dyfish më të lartë, në lotarinë shtetërore ekzistojnë dyshime edhe për prokurime dhe tenderë të tjerë të dyshimtë. Drejtori i këtij institucioni, Aleksandar Klimovski thotë për Alsat se organet e zbatimit të ligjit, i kanë marrë të gjitha dokumentet dhe ato janë vendosur tashmë nën llupën e hetimit.
“Përveç këtij prokurimi ka edhe prokurime të tjera të materialit harxhues, prokurime që kanë të bëjnë me shtëpi të caktuara marketingu dhe kështu me rradhë, ka edhe tenderë të tjerë pasi organet e zbatimit të ligjit, me urdhër të prokurorit publik, erdhën dhe e tërhoqën të gjithë dokumentacionin. Bëhet fjalë për prokurime që janë nën syrin e hetimit dhe me siguri do të ketë epilog të caktuar”, tha Aleksandar Klimovski, Drejtor i Lotarisë Shtetërore.
Udhëheqësia e re e Lotarisë shtetërore ka kërkuar nga Enti Shtetëror për Revizion që të dërgojnë ekip për të kryer revizion për vitet 2022 deri në vitin 2025.
“Ne dërguam kërkesë te Enti Shtetëror për Revizion, që në përputhshmëri me mundësitë dhe kapacitetet e tyre të bëjnë këtu verifikim të dokumenteve të caktuara nga puna financiare materiale. Shpresoj se revizioni shtetëror do të dërgojë revizorë këtu që ti shohin dokumentet e caktuara, dhe të kontrollojnë nëse ka pasur apo jo parregullsi, nga aspekti i tyre .. Në vitin 2025, për 2022, 2023, 2024”, u shpreh Aleksandar Klimovski, Drejtor i Lotarisë Shtetërore.
Klimovski tha se përmes sistematizimit të ri, do të rishikohen edhe punësimet në lotarinë shtetërore. Për një muaj e gjysmë, që kur erdhi udhëheqësia e re, është bërë edhe shkurtimi i kontratave në vepër.
Prej gjithsej 70 punonjësve të kësaj kategorie, për 35 punonjës janë ndërprerë kontratat. Drejtori tha se është konstatuar se për disa prej tyre nuk kishte nevojë, ndërsa disa të tjerë nuk vinin aspak në punë.
Ndryshe, Qeveria e Maqedonisë së Veriut më 17 shtator ka filluar nismën për shkëputjen e kontratës ndërmjet kompanisë “Hej” dhe Lotarisë Shtetërore të Republikës së Maqedonisë së Veriut. Kompania nga e cila Lotaria e ka marrë objektin me qira, lidh disa zyrtarë dhe familjarë të ngushtë të politikanëve nga BDI-ja në pushtet.
Policia Financiare në nëntor të vitit 2023 kishte hapur hetim paraprak duke marrë dokumentacion nga Lotaria shtetërore për të hetuar nëse ka parregullsi me dhënien me qira të lokalit afarist në një objekt afër Vizbegut. Bëhet fjalë për hapësira në një ndërtesë që paraprakisht shërbente për organizimin e dasmave, ndërsa të cilën Lotaria Shtetërore e ka marrë tashmë me qira nga kompania “Hej Dooel” për një shumë të madhe parash.
