Kurti e njoftoi kryeparlamentarin kroat për sul*min terr*orist në kanalin e Ibër-Lepencit

Kryeministri i Kosovës, Albin Kurti, u mirëprit nga Kryetari i Kuvendit kroat, Gordan Jandroković.

Bëhet e ditur se Kurti përgjatë bisedës theksoi progresin demokratik dhe shoqëror të Kosovës të katër viteve të fundit.

Në fokus të takimit ishte edhe fuqizimi e thellimi i bashkëpunimit të dyanshëm mes shteteve tona, si në rrafshin ekonomik dhe tregtar, por gjithashtu edhe në marrëdhëniet ndërmjet Kuvendeve tona, e sidomos në komisionet parlamentare për integrim evropian dhe ato për punë të jashtme.

Kurti shprehu dhe synimet strategjike të Kosovës për anëtarësim në organizatat ndërkombëtare dhe bashkimit të familjes së shteteve partnere në NATO dhe BE ku edhe Kroacia bën pjesë, për çka e falënderoi dhe shtetin kroat për përkrahjen dhe mbështetjen e vazhdueshme.

Në vijim, u trajtua edhe sulmi i fundit terrorist në kanalin e Ibër-Lepencit, për çka Kryeministri Kurti e njoftoi Kryetarin e Kuvendit të Kroacisë, Gordan Jandroković, për synimet destruktive të sulmit dhe dëmtimit të infrastrukturës kritike, si dhe për hetimet të cilat po vazhdojnë e kanë sjellë deri tash konfiskimin e armatimit, uniformave dhe emblemave të ushtrisë, shumica dërmuese prej të cilave janë të Serbisë dhe 20 tjera të Rusisë, e që tregojnë për përfshirje të Serbisë dhe aktorëve të tjerë të jashtëm.