Me çmime promocionale kundër bojkotit në RMV: Makaronat ulen për 4 denarë, dyqanet gjysmë bosh
Në pritje të bojkotit të nesërm ndaj marketeve të paralajmëruar, disa rrjete supermarketesh në vend po përpiqen të ulin ndikimin negativ të tij me ulje të çmimeve në disa prej produkteve. Por zbritjet për produktet që janë në shitje janë të parëndësishme, marketet janë thuajse bosh dhe konsumatorët komentojnë se jetesa e tyre është shumë […]
Në pritje të bojkotit të nesërm ndaj marketeve të paralajmëruar, disa rrjete supermarketesh në vend po përpiqen të ulin ndikimin negativ të tij me ulje të çmimeve në disa prej produkteve. Por zbritjet për produktet që janë në shitje janë të parëndësishme, marketet janë thuajse bosh dhe konsumatorët komentojnë se jetesa e tyre është shumë e shtrenjtë. Kjo ishte fotografia sot në disa supermarkete të mëdha, markete dhe shitore më të vogla në komunën e Çairit, të cilat sot në mëngjes dhe pasdite i vizitoi ekipi i Meta.mk, transmeton Portalb.mk.
Në teren u gjetën rafte të plota, ndërsa supermarkete e tregje gjysmë bosh. Kjo sigurisht ndikohet edhe nga fakti se shumica e qytetarëve janë pothuajse tërësisht të rraskapitur financiarisht në fund të janarit. Prandaj, lind pyetja, sa veta blejnë diçka të rëndësishme më 31 janar?
Ajo që bie në sy kur hyn në një nga supermarketet më të mëdha në Çair është se ka shumë produkte që janë në shitje, të shënuara me të kuqe – nga mishi, produktet e qumështit, produktet higjienike, mielli, makaronat. Nga sot e deri më 5 shkurt është në shitje fileto pule “Nature Premium”, prej të cilave vetëm 500 gramë kushtojnë 239, në vend të 289 denarë të rregullt. Makaronat “Danubius” 400 gram janë ulur për 4 denarë, kështu që në vend të 43 mund t’i blini për 39 denarë.
Biseduam me dy të moshuar që bënin pazar, duke mbajtur në duar vetëm një qese me makarona dhe bukë.
“Presim pension, por për më shumë po blejmë diku tjetër. Sidoqoftë, kudo dhe gjithçka është e shtrenjtë. Pensioni im është 17.000 denarë, gjyshi më pak. Nuk kemi para të mjaftueshme. Ne hamë mish një herë në javë. Na është shtrenjtuar shumë jetesa”, na tha gjyshja Trajanka.
Një nga arkëtarët e marketit na tha se sot në mëngjes ka pasur pjesëmarrje të zakonshme.
“Nesër pres të njëjtën gjë. Ushqimi është domosdoshmëri, njerëzit do të blejnë. Nuk besoj se do të bojkotojnë”, tha ajo.
Nuk kishte shumë aktivitet rreth mesditës në një supermarket tjetër në Çair, afër tregut. Kishte ulje çmimesh për disa produkte. Kështu, vaji “Brilliant” kushton 88 në vend të 97 denarë, kurse qumështi më i lirë në shitje është 50 denarë për litër nga një qumështore në Leskovc. Qumështat e tjerë janë shitur me çmim prej 57,53 denarë. Nuk kishte nxitim nëpër markete.
Marketi i tretë që vizituam kishte një sërë produktesh me zbritje, por gjithsesi jo aq sa supermarketi i parë. 23 denarë mund të blini një kilogram patate të vyshkura, pastaj bukën “Demetra” për 27 denarë, por me afat të sotëm. Ishte e vetmja bukë që është në shitje nga një duzinë e ofruar nga prodhues të ndryshëm.
Njerëzit bënin pazar, por kishin në dorë dy-tre produkte, produkte që janë në lirim. Ajo që bie në sy është se në shumë prej etiketave 15 janari është shënuar si afati i fundit i aksionit. E pyetëm njërën nga punonjëset nëse kjo zbritje është ende e vlefshme duke pasur parasysh që sot është 30 janar, të cilës ajo u përgjigj pozitivisht.
“Promocioni është vazhduar, mos u shqetësoni, do ta paguani çmimin promocional”, tha ajo.
Çmime promocionale për shumë produkte ka në një nga zinxhirët më të njohur të marketeve që kanë pronar të huaj. Në raftet e makaronave, për shembull, ka produkte nga më shumë se 10 prodhues. Por aksion ka vetëm për produktet e kompanisë “Misco”. Kështu, një qese makarona bie nga 77 në 69 denarë, me vlefshmëri të aksionit deri më 19 shkurt. Pas kësaj, 400 gramë thjerrëza janë 79 denarë, 900 gramë oriz 155 denarë, ndërsa gjysmë kilogram fasule është 199 denarë. Të gjithë ishin të “Sunny Valley” dhe nuk ishin me zbritje.
Në një tjetër supermarket të madh në Fushë Tophane, sot kishte më shumë gjallëri. Njerëzit bënin pazar me karroca dhe ajo që vihej re ishte se kishte shumë produkte me çmime promocionale – bukë, makarona, miell, produkte shtëpiake, produkte higjienike, mish, produkte qumështi. Megjithatë, edhe para reagimeve për çmimet e larta, në këtë market kishte gjithmonë shumë produkte me zbritje.
Mëngjesin e sotëm nuk ka pasur qarkullim as te marketi i Çairit në rrugën “Qemal Sejfulla”. Frutashitësi, nga i cili kemi blerë banane me çmim prej 50 denarë për kilogram, na tha se situata ka qenë katastrofike për një kohë të gjatë.
“Çfarë t’ju them, ne jemi katastrofë, nuk kemi qarkullim jo vetëm tani, por edhe para kësaj. Njerëzit nuk kanë para, populli po shtypet nga të gjitha anët. Dhe në shumicën e rasteve pemët dhe perimet i blejnë në market, sepse atje mund të paguajnë me kartelë”, tha shitësi.
Javën e kaluar, në Kroaci, qytetarët bojkotuan dyqanet, zinxhirët e shitjes me pakicë dhe pikat e karburantit për shkak të rritjes së vazhdueshme të çmimeve. Nisma e ka origjinën nga grupi në Facebook “Alo, Inspektor”, dhe është mbështetur nga shoqatat e mbrojtjes së konsumatorëve, sindikatat, partitë politike dhe madje edhe ministri i Ekonomisë. Në Kroaci, inflacioni vazhdon të rritet dhe vendi është ndër tre vendet e BE-së me inflacionin më të lartë. Një bojkot i ngjashëm ka pasur edhe në Mal të Zi, ndërsa në vendin tonë është paralajmëruar për nesër.
Ndërkohë, Qeveria ka paralajmëruar kontrolle rigoroze në markete që mund të luajnë lojëra me ligje dhe procedura.
