Mjaft ishim ne, sistemi është i radhës: Protestë në Shkup për jetët e marra nga korrupsioni (Foto – Video)
Nisur nga tragjedia e fundit në Koçan, qytetarët në Shkup sonte protestuan kundër korrupsionit i cili solli deri te katër tragjeditë e fundit në vend: Koçani, spitali modular, Besa Transi dhe Durmo Tursi. Deri sa ata i mbushin xhepat, ne do t’i mbushim rrugët, thonë protestuesit, raporton Portalb.mk. “Protestojmë sepse duam të jetojmë këtu… Protestojmë […]
Nisur nga tragjedia e fundit në Koçan, qytetarët në Shkup sonte protestuan kundër korrupsionit i cili solli deri te katër tragjeditë e fundit në vend: Koçani, spitali modular, Besa Transi dhe Durmo Tursi. Deri sa ata i mbushin xhepat, ne do t’i mbushim rrugët, thonë protestuesit, raporton Portalb.mk.
“Protestojmë sepse duam të jetojmë këtu… Protestojmë të mos ketë më viktima dhe të jemi të sigurt. Presim përgjegjësi nga të gjithë ata që kanë lidhje me tragjedinë në Koçan, por edhe nga tragjeditë tjera, duhet të përgjigjen…Presim transparencë nga organet hetuese…”, thanë mes tjerash nga Nisma “Kush është i radhës”.
Qytetarët fillimisht u mblodhën në sheshin “Maqedonia” ku u mbajtën tre minuta heshtje për viktimat, u vendosën lule dhe u ndezën dritat.
Protestuesit kanë filluar marshin drejt Kuvendit të RMV-së nga ku brohorasin: “Mjaft ishim ne, sistemi është i radhës”, “protestë e popullit”, “transparencë”.
“Nuk do të ju kalojë” bërtitën protestuesit para Kuvendit.
“Çdo njeri tjetër mund të jetë i radhës”, thonë protestuesit.
Protestuesit lëvizën drejt Parkut të Gruas përballë Kuvendit dhe Spitalit të Qytetit ku me duartrokitje prej 5 minutave falënderuan punonjësit shëndetësorë.
Qytetarët më pas arritën para Qeverisë së RMV-së, ku edhe aty dhanë mesazhet e tyre përmes pankartave dhe brohoritjeve.
Ndërkaq me 16 minuta heshtje u nderuan viktimat.
Blendi Hodai tha se tragjeditë për të cilat qytetarët u mblodhën sonte mund të parandaloheshin, siç tha nëse institucionet do të kishin kryer punën e tyre, nëse përgjegjësit do të mbanin përgjegjësi dhe nëse korrupsioni nuk do të ishte pranuar si “normal”.
“Jemi këtu për të nderuar viktimat, por nuk jemi këtu vetëm për tu ankuar. Ne jemi këtu sepse duam ndryshim, jo sa për sy e faqe. Jo të përkohshëm. Por ndryshim real, thelbësor, sistematik. Ne harrojmë shumë shpesh. Dhe një popull që harron rrezikon që tragjeditë të përsëriten. Prandaj, duke filluar nga sonte, themi qartë: Nuk do të harrojmë më, nuk do të heshtim më dhe nuk do të kemi më frikë”, tha Hodai.
Na lejoni të jetojmë në këtë sistem dhe shoqëri, kështu u shpreh Angella Kekenovska.
“Sistemi është i radhës, është koha ta ndryshojmë, është koha t’i japim fund, është koha për zgjidhje”, tha ajo.
Blendi Hodai shtoi se institucionet kanë frikë kur bashkohen njerëz të ndershëm. Kur qytetarët kërkojnë drejtësi, llogaridhënie dhe një fillim të ri.
“Kjo është luftë mes të ndershmëve dhe të korruptuarve. Mes atyre që e duan shtetin – dhe atyre që e përdorin shtetin.
Ne kërkojmë zero tolerancë ndaj korrupsionit. Zero heshtje kur institucionet dështojnë. Zero frikë kur përballemi me padrejtësi. Sepse ne u jemi borxhli atyre – të gjithë atyre që vuajtën, të gjithë atyre që humbën, të gjithë atyre që ishin viktima të një sistemi që në vend që të mbrojë – vret. Ndërsa ata mbushin xhepat, ne do mbushim rrugët”, tha Hodai.
Sot u protestua edhe në Tetovë kundër korrupsionit i cili solli deri në katër tragjeditë e fundit në vend: Koçani, spitali modular, Besa Transi dhe Durmo Tursi,
Ditëve të kaluara janë mbajtur disa protesta paqësore për tragjedinë e Koçanit edhe atë në: Shkup, Kumanovë, Gostivar, Strugë, Koçan etj.
Në zjarrin e rënë në diskotekën “Pulse” më 16 mars 2025, jetën e humbën 59 persona, midis të cilëve 6 të mitur, u lënduan 196 persona të cilët trajtohen brenda dhe jashtë vendit.
Sipas hetimeve të deritanishme nga institucionet, diskoteka nuk kishte rrjet hidranti dhe mjaftueshëm aparate PP, përdoreshin materiale piroteknike në mënyrë të paligjshme, nuk kishte as leje pune të ligjshme dhe nuk ishte lidhur asnjë kontratë me shkrim mes organizatorit dhe grupit interpretues.
Prokuroria në Koçan dhe Prokuroria për Ndjekjen e Krimit të Organizuar dhe Korrupsionit kanë identifikuar si të dyshuar gjithsej 34 persona dhe tre kompani për krime të rënda kundër sigurisë publike. Ndërkaq, Ministria e Punëve të Brendshme ka ngritur kallëzime penale kundër tyre, në mesin e tyre ka ish-funksionarë shtetërorë. Në paraburgim janë 24 persona.
