Një parking i ri në Tetovë: Zgjidhje sipërfaqësore për kaosin urbanistik të vazhdueshëm

Në bllokun urban 100 të Tetovës, garazhet e improvizuara janë zhvendosur, duke hapur hapësirën për një parking të ri, raporton Portalb.mk.

Për të përuruar këtë parking të ri, në terren doli edhe kreu i komunës Bilall Kasami.

“Ky projekt u realizua pas largimit të garazheve të improvizuara nga qytetarët, të cilat ishin ndërtuar pa standarde dhe i jepnin një pamje të papërshtatshme këtij blloku”, thonë nga Komuna e Tetovës.

Megjithatë Tetova vazhdon të përballet me mungesën e parkingjeve në qytet dhe kjo tani më është bërë përditshmëri për qytetarët, të cilët parkohen vend e pa vend, ku si rezultat krijohet edhe kaosi urbanistik.

Komuna e Tetovës edhe pse nuk e realizoi planin e viteve të kaluara për parkingje të reja, në janar premtoi se ka plan të ri detal urbanistik të bllokut 32. Bëhet fjalë për lokacionin nën Tregun e Gjelbër ku aktualisht ka parking të mbyllur ndërsa sipas nismës, aty planifikohet ndërtimi i garazhit në kate me 800 vend parkime. Deri më tani nuk ka pasur ndonjë aktivitet të dukshëm në terren për këtë parking.

• LEXO: Kaosi në trafik, u shkurtua orari për parkim zonal, por Kasami nuk e mbajti premtimin për parkim pa pagesë
• LEXО: Edhe pse nuk e realizoi planin e mëparshëm për parkingje, Komuna e Tetovës tani paralajmëron garazh në kate me 800 vende
• LEXO: Plani i plotë për vitin 2022 nuk u realizua, Kasami arsyetohet se për parkingjet në kate nuk mund të gjejnë zgjidhje ligjore (Video)
• LEXO: Ndërtimi i shtatë parkingjeve me konstruksion çeliku brenda gjashtë muajve të parë mbetet premtim i parealizuar i Kasamit