Qeveria e Maqedonisë së Veriut emëroi drejtorë të rinj në disa institucione

Në seancën e sotme të Qeverisë së Maqedonisë së Veriut ndër të tjera u bë edhe emërimi i drejtorëve të rinj në disa institucione shtetërore, transmeton Portalb.mk.

Ivica Bocevski do të jetë përfaqësuesi special i Qeverisë së RMV-së në kryesimin hungarez me Këshillin e Bashkimit Evropian.

Jeton Suma u emërua drejtor i Shërbimit për sistemin hapësinor dhe informativ.

Pece Stojkovski u emërua ushtrues detyre në pozitën e drejtorit të Agjencisë për nxitjen e zhvillimit të bujqësisë – Manastir, ndërsa Erol Abdiu në këtë institucion u emërua u.d. zëvendësdrejtor.

Blerim Sulejamni u emërua u.d. zëvendësdrejtor në Drejtorinë për zonat zhvillimore industriale teknologjike, ndërsa Kashmir Saliu te Drejtoria për mbrojtje dhe shpëtim.

Ushtrues detyre në pozitën e drejtorit në Drejtorinë për shëndetësi elektronike u emërua Fikret Shabani.

Zoran Pejkovski do të jetë drejtor i Qendrës informative kulturore të RMV-së në Sofje.

U.d. zëvendësdrejtor i Burgut të Shkupit do të jetë Afrim Idrizi, ndërsa Biljana Stefanoska do të jetë u.d. drejtor në Agjencinë për promovimin dhe mbështetjen e turizmit.

Ndryshe, Qeveria e re e Maqedonisë së Veriut në krye me Hristijan Mickoskin deri më tani ka emëruar disa emra të rinj në krye të institucioneve shtetërore, si pjesë e shkallës së tretë të pushtetit ekzekutiv.