Takimi Mickoski-Filipçe, opozita shqiptare: skandaloz, përjashtues për shqiptarët, VLEN: Presim të njoftohemi nga kryeministri

Pas takimit të djeshëm në mes kryeministrit Hristijan Mickoski dhe liderit të LSDM-së opozitare, Venko Filipçe ku u dakorduan të formohen organe apo grupe punuese të përbashkëta që do të punojnë në zbatimin e agjendës reformuese, të menjëhershme kanë qenë reagimet e partive shqiptare. Për partitë shqiptare në opozitë, takimi ishte skandaloz, ndërkaq koalicioni shqiptar […]

Prill 4, 2025 - 14:00
 0  6
Takimi Mickoski-Filipçe, opozita shqiptare: skandaloz, përjashtues për shqiptarët, VLEN: Presim të njoftohemi nga kryeministri
Kryeministri Hristian Mickoski dhe lideri i LSDM-së opozitare, Venko Filipçe. Foto nga profili zyrtar i Mickoskit në Facebook

Pas takimit të djeshëm në mes kryeministrit Hristijan Mickoski dhe liderit të LSDM-së opozitare, Venko Filipçe ku u dakorduan të formohen organe apo grupe punuese të përbashkëta që do të punojnë në zbatimin e agjendës reformuese, të menjëhershme kanë qenë reagimet e partive shqiptare. Për partitë shqiptare në opozitë, takimi ishte skandaloz, ndërkaq koalicioni shqiptar në pushtet VLEN, do pret të informohet nga kryeministri Mickoski për takimin në fjalë, shkruan Portalb.mk.

“Në deklaratat pas takimit skandaloz, kryeministri Hristijan Mickoski dhe lideri i SDSM-së, Venko Filipçe, konfirmuan të gjitha dyshimet tona dhe dolën në shesh planet e tyre. Janë dakorduar që të formojnë grupe pune në tre sfera që lidhen, i tangojnë ose kanë interes dy liderët në fjalë. Do të përgatisim reformën në Shëndetësi, sferë interesi e Venko Filipçes ku do të anashkalohet ministri aktual, Arben Taravari, në Energjetikë, sferë interesi e Hristijan Mickoskit, padronit të hidrocentraleve dhe në fund, “drejtësisë” ku Filipçe dhe Mickoski kanë interes të përbashkët për të shpëtuar njëri-tjetrin nga përgjegjësia për Koçanin, Spitalin Modular në Tetovë, Besa Trans, Durmo Turs dhe tragjedi e skandale të tjera që kanë ndodhur në vend. Kjo marrëveshje është kryekëput përjashtuese për shqiptarët, duke mos i trajtuar aspak as “partnerët” e tyre shqiptarë në Qeveri”, thuhet në reagimin e ASH-së, krahu i Ziadin Selës.

Nga aty theksuan se, kjo marrëveshje është edhe kundër qytetarëve, për t’ua fshehur atyre të vërtetën për çdo rast, për ta kapur sistemin, për ta instaluar diktaturën pasi ka kohë që e kanë kapur opozitën maqedonase dhe për ta rrënuar çdo të arritur të deritanishme.

“Pas këtij takimi çfarë do të ndodh me rigjykimin e tragjedisë me Spitalin Modular në Tetovë, kur njeriu më përgjegjës për atë spital do të udhëheq procesin reformues në emër të “drejtësisë”?”, thotë ASH-Sela.

Nga Bashkimi Demokratik për Integrim kanë pyetur se, si është e mundur që një takim liderësh për të ashtuquajturën “marrëveshje të re shoqërore” të mbahet mes partisë së parë dhe asaj të tretë në zgjedhje?

“A është përkatësia etnike kriteri për të marrë pjesë në këto negociata, në vend të legjitimitetit demokratik? A do të thotë kjo se po vendoset një praktikë e re e modelimit një etnik të shtetit, ku shqiptarët dhe komunitetet e tjera reduktohen në spektatorë? A është “marrëveshja e re shoqërore” një vazhdimësi e koalicionit të oligarkisë Mickoski–Zaev? A përfaqëson kjo iniciativë fillimin e një riformatimi post-Ohër të modelit kushtetues të Maqedonisë së Veriut? Pse në këtë takim nuk ishte i pranishëm asnjë përfaqësues i popullit shqiptar – as nga pozita, as nga opozita – nëse vërtet po diskutohet për të ardhmen e rendit shtetëror? A është ky një përpjekje për të ndërtuar një hierarki të re politike mbi bazë etnike, ku shqiptarët përjashtohen nga proceset thelbësore të vendimmarrjes? A është në këtë kuadër duke u diskutuar edhe mbrojtja e ndërsjellë nga përgjegjësia politike dhe ligjore – një lloj pakti joformal për mosndëshkim – për tragjedinë në Koçan, përballë tragjedisë së spitalit modular në Tetovë? Dhe në fund – a janë konsultuar fare partitë shqiptare të përzgjedhura nga Kryeministri për këtë takim? A kanë dhënë pëlqimin e tyre apo janë anashkaluar tërësisht? A mund të dëgjojmë të paktën një qëndrim të qartë prej tyre për këtë qasje njëetnike ndaj së ardhmes së shtetit? A janë të informuara që pala maqedonase e Qeverisë tashmë ka rënë dakord për formimin e grupeve të punës me opozitën maqedonase për të ndërtuar këtë “marrëveshje të re”? Apo roli i tyre është reduktuar në spektatorë të heshtur që vështrojnë nga korridoret, ndërsa në emër të tyre shkruhet një realitet i ri politik në të cilin as ata, as votuesit e tyre, nuk pyeten për asgjë?”, thuhet në kumtesën e BDI-së.

Ndërkaq, koalicioni shqiptar në qeverinë e Maqedonisë së Veriut, VLEN do të presin që të njoftohen nga kryeministri Mickoski për takimin me Venko Filiçen.

“Ky takim është inicuar nga kryetari i LSDM-së, Venko Filipçe. Në këtë takim mund të jenë diskutuar tema që u përkasin këtyre dy partive politike. Ne si VLEN kemi qenë të informuar dhe vazhdimisht kemi qenë të informuar për të gjitha ndodhitë që ndodhin në skenën politike. Ky komunikim i joni i vazhdueshëm do te jetë edhe në të ardhmen. Një takim që më së shumti ju ka shërbyer atyre si parti, ndoshta për ta qetësuar situatën pas gjithë ndidhive me tragjedinë e Koçanit. Me siguri se për këtë do të njoftohemi nga ana e kryeministrit, për atë se çfarë bisedash janë bërë aty dhe çfarë vendimesh janë marr”, tha zëdhënësi i VLEN, Driton Sulejmani në intervistën e tij dhënë për Alsat-M.

Në deklaratë për mediat, lideri i LSDM-së, Venko Filipçe pas takimit tha se ka pasur takim të mirë dhe konstruktiv me kryeministrin Mickoski dhe që në të ardhmen pret që edhe partitë tjera politike t’i bashkohen këtij modeli të bashkëpunimit, duke theksuar se “duhet të dërgojmë mesazh bashkimi për të mirën e vendit”, ndërkaq nga ana tjetër, kryeministri Hristijan Mickoski kumtoi se “interesat shtetërore maqedonase duhet të jenë pikënisje në bisedimet për çdo çështje. Shteti duhet të jetë në shërbim të qytetarëve dhe të ndodhin reforma të thella në sistemin nga i cili qytetarët janë të pakënaqur”, deklaroi Mickoski.