Zhvillohen bisedime intensive, por ende nuk është arritur marrëveshje me Bullgarinë për ndërtimin e tunelit hekurudhor nga Korridori 8
Ende nuk është arritur marrëveshje, por po zhvillohen bisedime intensive dhe është çështje kohe, javësh e jo muajsh kur do të dalim me lajme pozitive, sigurisht nëse ka vullnet të mirë nga ana e Bullgarisë. Kështu deklaroi sot zëvendëskryeministri dhe ministri i Transportit, Aleksandar Nikolloski, duke iu përgjigjur pyetjes së një gazetari nëse është arritur […]
Ende nuk është arritur marrëveshje, por po zhvillohen bisedime intensive dhe është çështje kohe, javësh e jo muajsh kur do të dalim me lajme pozitive, sigurisht nëse ka vullnet të mirë nga ana e Bullgarisë. Kështu deklaroi sot zëvendëskryeministri dhe ministri i Transportit, Aleksandar Nikolloski, duke iu përgjigjur pyetjes së një gazetari nëse është arritur marrëveshje për ndërtimin e përbashkët të tunelit hekurudhor nga Korridori 8 nga pala maqedonase dhe bullgare, transmeton Portalb.mk.
“Ideja është që të arrihet një marrëveshje me të cilën do të lidhet Shkupi dhe Sofja dhe jo të lidhen siç është tani, për fat të keq, situata. Kontrata duhet të përmbajë tre segmente. E para është ndërtimi i një tuneli të përbashkët që duhet të lidhë dy vendet. Fatkeqësisht, në projektin e mëparshëm, tuneli përfundoi fjalë për fjalë në gjysmë të rrugës, në një rrugë apo hekurudhë qorre. Pjesa e dytë është obligim i qartë për Sofjen që të ndërtojë pjesën nga kufiri me Maqedoninë deri në Gjueshevë, si dhe të rindërtojë pjesën nga Gjuesheva në Sofje për të pasur edhe një hekurudhë moderne nga ana e tyre. Detyrimi i tretë është i yni, ta rishikojmë projektin që tashmë po e bëjmë, sepse është e pamundur që ai projekt të kushtojë kaq shumë, për kaq pak kilometra të shpenzohen kaq shumë para”, tha ai pas vizitës së sotme në “Hekurudha-Transport”.
Qeveria e Bullgarisë i ka dërguar Republikës së Maqedonisë së Veriut një projekt-kontratë për përgatitjen, ndërtimin dhe funksionimin e një tuneli hekurudhor ndërkufitar që lidh dy vendet, njoftoi më 15 janar Ministria Bullgare e Transportit dhe Lidhjeve.
Propozimi i shtetit bullgar, siç u njoftua në atë kohë, është që të dy qeveritë të ndërmarrin angazhime specifike dhe të qarta për realizimin e tunelit hekurudhor kufitar, i cili është pjesë kyçe e ndërtimit të Korridorit 8 të transportit evropian, i cili lidh Detin e Zi me detin Adriatik dhe kalon nëpër territoret e Bullgarisë, Maqedonisë së Veriut dhe Shqipërisë.
Qeveria maqedonase më 28 janar njoftoi se ka marrë draft tekstin e Marrëveshjes për përgatitjen, ndërtimin dhe shfrytëzimin e tunelit ndërkufitar nga rruga hekurudhore e Korridorit 8, e cila ishte përgatitur dhe dërguar nga Bullgaria tek autoritetet maqedonase.
Është marrë vendimi për formimin e grupit punues i cili do të punojë për shqyrtimin e propozimit në periudhën e ardhshme.
Sa për kujtesë, Qeveria e Bullgarisë më 30 dhjetor të vitit të kaluar miratoi projekt-marrëveshjen me Maqedoninë e Veriut për ndërtimin dhe funksionimin e tunelit hekurudhor ndërkufitar “Deve Bair”, dhe siç njoftoi atëherë Ministria e Transportit bullgar, do të formohet një komision i përzier dhe teksti i marrëveshjes do të diskutohet me palën maqedonase.
