Antikorrupsioni: Vijon procedura për lëndën e udhëtimit të zyrtarëve të RMV-së në Uashington

Vijon procedura për lëndën e Komisionit Shtetëror për Parandalim të Korrupsionit, në lidhje me udhëtimet e zyrtarëve nga Republika e Maqedonisë së Veriut për inaugurimin e presidentit amerikan Donald Trump, shkruan Portalb.mk. Një muaj pas hapjes së lëndës për udhëtimet e politikanëve në Uashington, për redaksinë e Portalb.mk nga KSHPK konfirmojnë se procedura është në […]

shkurt 18, 2025 - 13:00
 0  9
Antikorrupsioni: Vijon procedura për lëndën e udhëtimit të zyrtarëve të RMV-së në Uashington
Arben Taravari, Zeqirija Ibrahimi, Afrim Gashi dhe Izet Mexhiti. Foto e marrë nga profilet e tyre në Facebook. Ilustrim: Fisnik Xhelili/Portalb.mk

Vijon procedura për lëndën e Komisionit Shtetëror për Parandalim të Korrupsionit, në lidhje me udhëtimet e zyrtarëve nga Republika e Maqedonisë së Veriut për inaugurimin e presidentit amerikan Donald Trump, shkruan Portalb.mk.

Një muaj pas hapjes së lëndës për udhëtimet e politikanëve në Uashington, për redaksinë e Portalb.mk nga KSHPK konfirmojnë se procedura është në vijim e sipër.

“Procedura për rastin e mësipërm është në vazhdim e sipër. Pas konstatimit të gjendjes faktike, vendimi për rastin e lartpërmendur do të merret dhe do të dërgohet në seancë publike të KSHPK-së”, thuhet shkurt në përgjigjen e KSHPK-së.

Tema e udhëtimit të kreut qeveritarë në Uashington kishte nxitur debat publik në vend. Pozita është lavdëruar me prezencën e saj në Uashington, derisa opozita ka këmbëngulur se asgjë e rëndësishme nuk e ka veçuar udhëtimin, përveç se promovimin e interesit personal.

Në Uashington kanë udhëtuar kryeministri Hristijan Mickoski, ministri i Jashtëm Timço Mucunski, kryetari i Kuvendit Afrim Gashi, zëvendëskryeministri dhe ministri i Mjedisit Izet Mexhiti, ministri i Shëndetësisë Arben Taravari, kryetari i Alternativës Zeqirija Ibrahimi.

Kujtojmë se inaugurimi i presidentit të ri amerikan Donald Trump u mbajt më 20 janar. Sipas mediave amerikane Trumpi është presidenti i parë i zgjedhur në mbi një shekull që fton udhëheqësit e huaj në ceremoninë e tij të betimit. Historikisht, në këtë ngjarje kanë marrë pjesë diplomatët e huaj dhe ambasadorët.