Janevska: Ka gjasa që të mbyllen një numër i madh i instituteve pasi nuk i plotësojnë kushtet
Përveç dy të mbyllurve deri më tani, Ministrja e Arsimit dhe Shkencës Vesna Janevska tha se pret që të përfundojë procedura dhe të ndërpritet funksioni, përkatësisht të mbyllen edhe dy institute të tjera, pas revizionit të punës së tyre. Siç bën me dije ajo, deri më tani është bërë auditim në 15 institute, ndërsa kontroll […]
Përveç dy të mbyllurve deri më tani, Ministrja e Arsimit dhe Shkencës Vesna Janevska tha se pret që të përfundojë procedura dhe të ndërpritet funksioni, përkatësisht të mbyllen edhe dy institute të tjera, pas revizionit të punës së tyre. Siç bën me dije ajo, deri më tani është bërë auditim në 15 institute, ndërsa kontroll operativ ka edhe në pesë të tjera, transmeton Portalb.mk.
Dhjetërave institute, tha ministrja duke iu përgjigjur pyetjeve të gazetarëve, u është dhënë afat prej tre muajsh për të korrigjuar parregullsitë e konstatuara, por sipas raportimeve që ka pasur mundësi të lexojë, shumë pak prej tyre do ta bëjnë atë.
“Fatkeqësisht, më duhet të them se me gjasë do të pasojë mbyllja e një numri të madh institutesh që janë jofunksionale, që nuk respektojnë ligjin, pra nuk plotësojnë kërkesat, dhe mendoj se është mirë për arsimin e lartë dhe shkencën në vend për të sjellë më në fund rregull. Kushdo që plotëson një kusht do të punojë. Siç e kam thënë shumë herë më parë, nuk do të punojë askush që nuk punon sipas ligjit”, tha Janevska gjatë një vizite në Shtip.
Gati dy javë më parë, poashtu gjatë një vizite në Shtip, ministrja e Arsimit dhe Shkencës deklaroi se auditimi i Ministrisë, përveç disa universiteteve, ka konstatuar parregullsi edhe në institute, dy prej të cilave janë mbyllur.
“Procesi i mbylljes së dy instituteve ka përfunduar plotësisht, vazhdon në këtë moment, ndoshta në tre të tjera, por edhe ky duhet të përfundojë dhe do të merrni informacion. Le t’i mbyllim dhe siç thashë do t’i publikojmë në mënyrë transparente”, tha Janevska më 7 nëntor.
Sa i përket universiteteve, ministrja më pas tha se Inspektorati Shtetëror Arsimor është duke punuar vazhdimisht për të gjitha raportet që u arrijnë dhe deri më tani në disa prej tyre janë konstatuar parregullsi të caktuara.
Për disa prej tyre, shtoi ajo, procesi pothuajse ka përfunduar dhe ka filluar procedura për mbledhjen e gjobave nga komisionet shqyrtuese, dekanët dhe rektorët.
E pyetur për universitetin “Goce Dellçev” në Shtip, Janevska tha se aty është bërë inspektim dhe se për momentin pritet raporti.
“Është e rëndësishme që të gjitha universitetet pa përjashtim të kalojnë në këtë proces dhe kudo që të përfundojnë proceset, rezultatet do të publikohen në mënyrë publike dhe transparente”, tha ministrja e Arsimit dhe Shkencës.
Më herët në një intervistë për Radion Evropa e Lirë (REL), Janevska ka treguar se parregullsi janë konstatuar në Universitetin e Tetovës, në Universitetin “Shën. Apostull Pal” në Ohër dhe në universitetin në Strugë.
“Kemi zgjedhje të paligjshme të dy profesorëve në Universitetin e Tetovës dhe atje inspektimi është ende në vazhdim. Kemi probleme në Universitetin “Apostol Pavle” dhe aty janë konstatuar parregullsi. Kishte një problem serioz në universitetin e Strugës, ku mbyllëm departamentin e shkencave mjekësore. Këto janë sërish procese të vazhdueshme që janë ende në fazën e analizës, sepse Ligji për Inspeksionin Arsimor jep edhe udhëzime të caktuara se si të punohet. Për disa lëshime thuhet se duhet të hiqen brenda një afati, pastaj Inspektorati Shtetëror Arsimor shkon të kontrollojë nëse janë hequr apo jo… Kemi mbyllur dy institute shkencore dhe mendoj se do mbyllim edhe dy të tjera së shpejti, në një të ardhme shumë të afërt”, tha Janevska në intervistë.
E pyetur nëse do të ketë mbyllje të universiteteve, ministrja u përgjigj:
“Nuk mund të them në këtë pikë që do të mbyllen, por kur inspektimi të përfundojë. do të tregojë se çfarë duhet bërë”.
