Janevska: Sigurohet mbështetje psikologjike për nxënësit

Ministrja e Arsimit dhe Shkencës Vesna Janevska sot në një konferencë për media informoi se pas tragjedisë në Koçan, Ministria në bashkëpunim me UNICEF-in, profesorët e Institutit të Psikologjisë në Universitetin “Shën Kirili dhe Metodi”, Oda e Psikologëve të Maqedonisë dhe Kryqi i Kuq, kanë ofruar mbështetje më të fortë psikologjike për të gjithë të rinjtë të cilët kanë qenë të përfshirë ose prekur nga tragjedia në Koçan.

“Menjëherë pas ngjarjes tragjike u përgatitën dhe u dërguan udhëzime shkollave, mësimdhënësve dhe prindërve për veprim në periudhën e ardhshme, gjegjësisht për ofrimin e ndihmës së parë psikologjike dhe mbështetjes psikosociale. Udhëzimet janë të disponueshme në të pesë gjuhët në të cilat zhvillohet mësimi”, tha Janevska.

Është formuar rrjet prej 100 psikologëve të shkollave nga Shkupi, por edhe nga qytete të tjera, të cilët po i drejtojmë në Koçan, Vinicë, Shtip, Çeshinovë – Obleshevë dhe vendet në rrethinë, si mbështetje për kolegët e shkollave atje, për të punuar me nxënësit, prindërit e tyre, mësimdhënësit dhe qytetarët në përgjithësi, ndërsa duke vepruar sipas protokollit të posaçëm të përgatitur për ndërhyrje në krizë

Deri më tani, 32 psikologë kanë përfunduar trajnimin e specializuar, në të cilën janë përfshirë Oda e Psikologëve, Byroja për Zhvillimin e Arsimit dhe UNICEF-i, dhe tashmë ofrojnë mbështetje të drejtpërdrejtë në terren.

“Në ueb faqen e Ministrisë së Arsimit dhe Shkencës është publikuar lista e kontakteve telefonike të 40 psikologëve, anëtarë të Odës së Psikologëve të Maqedonisë, të cilët vazhdimisht janë në dispozicion për bisedë, përkatësisht për këshillim psikologjik. Lista përfshin gjithashtu linja të dedikuara të ndihmës së parë psikologjike të Kryqit të Kuq që janë funksionale 24/7”, tha Janeva.

Ndihmë mund të kërkohet edhe në qendrat e Kryqit të Kuq në çdo kohë, si dhe në Qendrën e Shëndetit Mendor në Koçan, ku ka përfaqësues të Klinikës Universitare për Psikiatri.

Janevska inkurajoi personat profesional të cilët dëshirojnë të ndihmojnë në këtë situatë për të plotësuar nevojat e nxënësve, prindërve dhe mësimdhënësve. Nëse kanë nevojë për udhëzime më të sakta se ku janë më të nevojshme dhe si të veprojnë, mund të drejtohen deri te Ministria dhe deri te Oda e Psikologëve.

Ministria e Arsimit dhe Shkencës, në kuadër të kompetencave të saj, do të vazhdojë të ndërmarrë dhe koordinojë aktivitete që mund t’i ndihmojnë të rinjtë në përballjen me sfidat.