Kurti pas sulmit ndaj kryeministres daneze: Figurat politike, veçmas gratë po përballen me kërcënime alarmante

Kryeministri i vendit, Albin Kurti, është shprehur i shqetësuar me sulmin e sotëm ndaj kryeministres daneze, Mette Frederiksen.

Kurti tha se kjo ngjarje shqetësuese vjen mes dhunës dhe tensionit në rritje përpara zgjedhjeve të Bashkimit Evropian.

“Figurat politike, veçanërisht gratë, përballen me kërcënime dhe rreziqe alarmante në rolet e tyre publike, duke theksuar kërcënimin e rëndë ndaj demokracisë që përfaqësojnë sulme të tilla. I urojmë kryeminsitres Frederiksen shërim të shpejtë dhe të plotë gjatë kësaj kohe sfiduese”, shkroi Kurti.

Kryeministrja daneze u sulmua sot në një shesh të Kopenhagës, ndërsa policia ka bërë të ditur se autori është arrestuar.