Përkujtohet 36-vjetori i rënies së Naser Veliut, homazhe në Sërmnovë

Sot është përkujtuar 36-vjetori i rënies së veprimtarit të shquar të çështjes kombëtare, Naser Veliu. Aktivitetet përkujtimore janë zhvilluar në fshatin e tij të lindjes, në Sërmnovë të Gostivarit, ku familjarë, bashkëveprimtarë dhe qytetarë kanë bërë homazhe në vendprehjen e tij.

Në kuadër të përkujtimit, është realizuar edhe vizitë në shtëpinë përkujtimore të familjes Veliu, ku janë ndarë kujtime dhe dëshmi për jetën dhe veprimtarinë e tij në shërbim të çështjes kombëtare.

”Kënaqësi dhe nder që edhe këtë vit mora pjesë në nderim-përkujtimin e Naser Veliut dhe Nurije Zekaj, të rënë në rrugën e kryerjes së detyrave të caktuara nga programi ynë kombëtar. Kujtimi për ta mbetet i gjallë, ndërsa sakrifica e tyre vazhdon të jetë udhërrëfyes për brezat që vijnë”, shprehet Valdet Xhaferi, kryesues i Këshillit Komunal.

Ngjarja përfshin edhe përkujtimin e Nurije Zekajt, e cila gjithashtu ra në rrugën e angazhimit për idealet kombëtare.

Kush ishte Naser Veliu?

Naser Veliu ishte një nga veprimtarët e hershëm të çështjes kombëtare shqiptare, i angazhuar në organizime ilegale dhe aktivitete politike në periudhën e ish-Jugosllavisë. Ai u shqua për përkushtimin e tij në afirmimin e të drejtave të shqiptarëve dhe për aktivitetin e tij në terren, duke u bërë një figurë e respektuar në rrethin e Gostivarit dhe më gjerë. Rënia e tij konsiderohet si sakrificë në shërbim të idealeve kombëtare.

Kush ishte Nurije Zekaj?

Nurije Zekaj ishte veprimtare e përkushtuar, e njohur për angazhimin e saj në çështjen kombëtare dhe për mbështetjen e strukturave atdhetare në periudha të vështira. Ajo u dallua për guximin dhe vendosmërinë e saj, duke mbetur simbol i kontributit të grave shqiptare në përpjekjet për liri dhe dinjitet kombëtar.

Organizatorët kanë bërë thirrje që këto figura të kujtohen jo vetëm në përvjetorë, por të mbeten pjesë e kujtesës kolektive si shembuj të sakrificës dhe përkushtimit.

Organizimi i homazheve dhe aktivitetit përkujtimor në Sërmnovë është bërë nga Shoqata e Veteranëve të Luftës së UÇK-së (SHVL–UÇK), në bashkëpunim me familjen Veliu, të cilët njëkohësisht janë edhe pritësit e këtij përkujtimi. Gazeta Flaka

The post Përkujtohet 36-vjetori i rënies së Naser Veliut, homazhe në Sërmnovë appeared first on Flaka, në çdo lajm... .