KESKO: Kosovarët kanë kursyer energjinë elektrike këtë vit

Kompania për Furnizim me Energji Elektrike (KESCO), ka bërë të ditur se gjatë 2024 rreth 86 % e amvisërive paguan çmime vetëm në bllok tarifën e ulët, atë nën 800 kWh.

Rrjedhimisht, çmimin me rritje të energjisë elektrike e kanë paguar vetëm rreth 16 % të konsumatorëve të amvisërisë.

ZRRE ka ndërtuar një strukturë tarifore të ndarë në blloqe shpenzuese. Kështu, nëse ju si konsumator familjar konsumoni deri në 800 kWh, atëherë i nënshtroheni vetëm dy blloqeve, ditën dhe natën, të cilat në dimër fillojnë nga ora 22:00 deri në orën 7:00. Gjatë ditës çmimi është 7.79 cent për kWh, ndërsa natën rreth 57 për qind më i lirë, pasi llogaritet me 3.34 cent për kWh.

Megjithatë, çmimet ndryshojnë për konsum mbi 800 kWh. Nëse një konsumator konsumon 1600 kWh, atëherë pjesa deri në 800 kWh llogaritet me çmimet e lartpërmendura.

Ndërsa pjesa e mësipërme llogaritet me 2 tarifa të tjera: ajo e larta gjatë ditës që shkon në 14.45 cent për kWh ose 85.5 për qind më shtrenjtë, dhe ajo e natës 6.81 cent për kWh ose gati 104 për qind më e shtrenjtë se shpenzimi nën 800 kWh.