Gashi: Ligji për përfaqësim të drejtë dhe adekuat pritet të miratohet në mars ose prill

Kryeparlamentari, Afrim Gashi, ka bërë të ditur se ligji për përfaqësim të drejtë dhe adekuat pritet të hyjë së shpejti në procedurë parlamentare. Në një intervistë për “360 Gradë” në MRT 1, ai u shpreh optimist se ky ligj mund të miratohet gjatë muajve mars ose prill, duke theksuar se ekspertët kanë punuar prej kohësh për një zgjidhje të mirë kushtetuese.

“Edhe sikur të kishte mbetur balancuesi, ne kishim idenë për të miratuar ose propozuar një ligj të ri, pasi ishte e qartë që ai mekanizëm nuk dha rezultatet e dëshiruara dhe ishte keqpërdorur vitet e fundit. Për këtë arsye, mendoj se vendimi i Gjykatës Kushtetuese ishte i drejtë”, deklaroi Gashi.

I pyetur nëse ligji do të reflektojë përqindjet nga regjistrimi i popullsisë, ai tha se nuk i di detajet, por theksoi se zgjidhja ligjore është ndërtuar mbi bazën e parimeve kushtetuese dhe amendamenteve ekzistuese.
“Drejtësia është thelbësore në këtë proces. Nuk duhet ta shohim gjithçka vetëm nga këndvështrimi i përqindjeve. Duhet të fokusohemi në dimensionin cilësor dhe perspektivën që sjellin njerëzit në administratën publike dhe shtetërore”, përfundoi Gashi.